Vision Group ewagidde Paasita Bugembe mu bivvulu bye
KKAMPUNI ya Vision Group ng’ eyita mu mikutu gyayo egy’enjawulo esabuukuludde enteekateeka zaayo ez’okuwagira ekivvulu kya Pasiita Wilson Bugembe ekituumiddwa Katonda W’abanaku Mw’eno Ensonga.
Paasita Bugembe, Simon Maseruka, No Creature, ne Judith Kaweesi akola pulogulamu Kasalabecca ku bukedde TV.
Bya Paul Galiwango
KKAMPUNI ya Vision Group ng’ eyita mu mikutu gyayo egy’enjawulo esabuukuludde enteekateeka zaayo ez’okuwagira ekivvulu kya Pasiita Wilson Bugembe ekituumiddwa Katonda W’abanaku Mw’eno Ensonga.
Vision group ng’ eyita mu mikutu gyayo egy’enjawulo okuli; Bukedde TV, Bukedde Radio, Bukedde Olupapula n’endala wamu n’aba CRK Planet bamaliriza enteekateeka z’okuwagira ebivvulu bya Paasita Bugembe yonna gye bigenda okuba.
Bw’abadde asabuukulula enteekateka eno ku lwa Vision Group, Simon Maseruka amanyidwa nga Simo Omunene w’ekibuga owa pulogulaamu Bukedde Butya ku Bukedde radio ategeezeza nti Vision Group olw’enkolagana ennungi gy’erina n’omuyimbi Paasita Bugembe ebadde teyinza butamuwagira.
Maseruka ategeezezza nti olw’okuba ng’ensimbi ezigenda okuva mu bivvulu zaakuyambako okuzimba ekkanisa ya Worship House e Nansana Bugembe gy’asumba, tewali nsonga lwaki Vision Group eyinza obutawagira mulimu gwa Mukama.
Maseruka akunze abantu okujja mu bungi okuwagira Paasita Bugembe okudduukirira omulimu gw’okuzimba enynumba ya Mukama n’ategeeza nti ebbanga ery’e myaka 2 egy’omuggalo nga tewali bivvulu Bannayuganda basaanye okujja mu kivvulu ekigenda okuggulawo ebivvulu.
Kitunzi w’ekivvulu kino No Creature ategeezeza nti enteekateeka zonna ziri bulungi n’ategeeza nti ekivvulu kyakubaawo nga June 3,2022 ku Hotel Africana ate nga june 4, 2022 kibeere ku Collins Hotel e Mukono, nga 5 Kasambya mu kisaawe e Kyotera ate nga 10 e Mityana mu kisaawe ky’eggombolola nga 11 kiri Luweero mu kisaawe amalirize nga 12 ku kkanisa ya Worship House e Nansana.
Bw’abadde ayogerako ne Bukedde Bugembe asiimye Vision Group olw’okumuwagira n’akoowola abawagizi bonna gyebali okujja mu bungi okumuwagira n’abasuubiza okubakuba kayimba ku kayimba okuva kw’obwo bwe yasookerako okutuuka ku Katonda w’Abanaku.
Bugembe yategeezezza nti abayimbi bangi abamuwerekeddeko nga bonna baakuyimba nnyimba za ddiini n’agattako nti ssente ezinafikka ku z’okuzimba ekanisa waakuzikozesa okuyambako abali mu bwetaavu.
Bugembe yagasseeko nti okuyingira buli muntu waakusasula 20,000/-, VIP 50,000/- ng’ emmeeza ey’abantu 10 ya bukadde 2 ku Hotel Africana wabula ewasigadde buli muntu okuyingira waakusasula 10,000/-.