Ssaabalabirizi Kazimba atuuse mu Bulabirizi bwa South Ankole

Bya Willy Ssemmanda

SSAABALABIRIZI w’Ekkanisa ya Uganda, Dr. Stephen Samuel Kazimba Mugalu atuuse mu Bulabirizi bwa South Ankole obusangibwa mu Disitulikiti y’e Ntungamo gy’akyaddeko mu bugenyi obw’enjawulo.

Ssaabalabirizi w'ekkanisa ya Uganda Stephen Kazimba Mugalu atuuse mu Ankole

Ku bugenyi buno Kazimba asuubirwa okukyalako mu Bussaabadinkoni bw’e Kitunga ne ku kkanisa ya Kibingo mu Bussaabadinkoni bw’e Nyakyera oluvannyuma abuwunzikire ku kijaguzo ky’emyaka 13 egy’Obulabirizi buno ekigenda okubeera ku Lutikko y’Obulabirizi ey’Omutukuvu Matthew e Kyamate.

Kazimba e Ntungamo yatuuseeyo mu kawungeezi k’Olwokuna nga yayaniriziddwa Omulabirizi waayo Rt. Rev. Nathan Ahimbisibwe ne mukyala we Maama Lillian Ahimbisibwe; Diini wa Lutikko Rev. Can. Cranmer Mwesigwa, Omuwandiisi w’Obulabirizi Rev. Canon Arthur Twinamatsiko, RDC wa Ntungamo Isaiah Kanyamahane n’Abakristaayo b’Obulabirizi bwa South Ankole.

Obulabirizi bwa South Ankole bwasalwa ku bwa Ankole n’obwa West Ankole mu 2012 era Omulabirizi Ahimbisibwe ye yasooka okutuuzibwa ng’Omulabirizi waabwo nga January 8, 2012 nga yatuuzibwa Ssaabalabirizi eyawummula Rt Rev Henry Luke Orombi.