Owabbooda eyawondedde ababbi nga baakamala okukola omunyago bamukubye amasasi ne bamuleka ng'ataawa

Abazigu b’emmundu babiri babbye  ssente ku mmotoka y’abasuubuzi emisana ttuku ne batwala n’emmundu endala ku muserikale w’ekitongole ekikuumi kyokka ne babulawo nayo.

Abantu batemezza ku babbooda nabo abasitukiddemu ne  bagoba mmotoka y’ababbi kyokka omu bw’abatuseeko ne basiba mmotoka ne bamukuba essasi ne beeyongerayo.

Bukenya Bw'afaanana.

Poliisi ebawondedde wabula ezudde kigala kya mmundu kye baamenye ku mmundu gye baanyaze ku mukuumi abadde akuuma abasuubuzi nga bo ababbi nakati bakyabuze.

Bino byabadde  mu Nkokonjeru mu disitulikiti y’e Buikwe abanyazi ab’emmundu bwe baagwikirizza mmotoka y’abasuubuzi abatambuliza ebyamaguzi nga babisuubuza ba nannyini maduuka nga babibasanze ku maduuka wennyini we bakolera.

Bano okusooka baali baafuna obuzibu bw’okubanyagira mu makubo kwe kutandika okufuna abakuumi ab’emmundu be batambula nabo okubakuuma wamu ne ssente ze batambula nazo eziba zitundiddwa mu bintu bye baguza ab’amaduuka.

Essasi Eryagudde Mu Kisu.

Okusinziira ku mwogezi wa poliisi mu kitundu kya Ssezibwa, Hellen Butoto agamba nti waabaddewo mmotoka ekika kya Canter no. UBD 418F eyatisse eby’amaguzi okuva e Mukono ng’egenda ebiguza abasuubuzi mu maduuka agatali gamu e Nkokonjeru.

Eyabadde avunaanyizibwa ku kutunda ebintu Okecho George owa SAGER Trading Ltd ettabi ly’e Mukono baalabye abasajja babiri nga buli omu akutte emmundu nga bali mu mmotoka ey’ekika kya Wish  enjeru nga ennamba zaayo zibikkiddwa ne basooka okusonga emmundu mu mukuumi eyabadde awerekera mmotok.

Mu bwangu baamugyeeko emmundu ne banyaga ensimbi ku Okecho obukadde 4 n’emitwalo kinaana (4,800,000) ne badda mu motoka eyabadde obulindaala ne babulawo.

Emmanuel Muwonge, ye wabbooda eyabatuseeko n’abeetegereza nga beebikiridde ng’abakyala Abasiraamu  kyokka omu eyabadde ku ludda olulala olutali lwa ddereeva yassizza endabirwamu n’amukuba essasi mu mikono.

Butoto agambye nti  omukuumi Timoto Charles owa Top Security Company ng’awerekerwako banne yeefudde nga agenda ku Poliisi e Nkokonjeru okuloopa obunyazi kyokka yeemuludde n’adduka nga n’essimu ze teziriiko.

Ayongeddeko nti mu kiseera kino baagala kuzuula omukuumi ababuulire ebyabaddewo n’engeri emmundu gye yamugiddwaako ate n’atasobola kutegeeza poliisi.

Gye buvuddeko katono abanyazi ab’emmundu baanyaga obukadde 25 emisana ttuku , abalala ne batta owa Mobile Money e Ngogwe ne babulawo ne ssente ze yali nazo ekireeseewo okweraliikirira olw’emmundu endala eyatwaliddwa