Okugwa kwa bbeeyi y’emmwaanyi kwefuze oluwalo

MMENGO esabye abalimi b’emmwaanyi obutaggwaamu maanyi mu kuzirima olwa bbeeyi yaazo eyagudde.
Minisita w’abavubuka, emizannyo n’ebitone, Ssaalongo Robert Sserwanga bwe yabadde atikkula ‘oluwalo’ lwa nsimbi 92,280,420/- olwavudde e Bukulula e Buddu, Ssaabawaali Kasanje, Ssaabagabo Nsangi mu Busiro, Ntenjeru ne Nakisunga ne Kyaggwe, yagambye nti, Mmengo erumirwa wamu n’abalimi olw’ebbeeyi y’emmwaanyi eyagudde.
“Noolwekyo mu kaseera kano alina emmwaanyi ennyingi nga bazigula 1,000/- asingira wala oyo alina entono. Tugende mu maaso, ebbeeyi enkya eyinza okubeera endala,” Sserwanga bwe yasabye.
Bbeeyi y’emmwaanyi esse nga kati kkiro ya kase eri ku 8,500/- okuva ku 15,000/- ate ezitali nkube kkiro eri ku 4,000/- okuva ku 8,000/- emabegako.
Minisita omubeezi ow’amazzi mu gavumenti eya wakati, Aisha Ssekindi n’omubaka wa Kalungu East mu Palamenti, Katabaazi Katongole beebazizza Obwakabaka olw’okulambika abantu ku bulimi bw’emmwaanyi.