Nnamukadde eyafeze omuyizi emitwalo 10 awonedde watono okugajambulwa abatuuze

NNAMUKADDE ow'emyaka 60 ne muwala we bawonedde watono okugajambulwa abatuuze ababadde bataamye lwa kukwatibwa lubona nga bafeze omuwala ow'emyaka 16.

Abatuuze ba Katoogo zzooni mu Bwaise II mu ggombolola y’e Kawempe bavudde mu mbeera ne bayisaamu namukadde ne muwala we empi , oluvanyuma lw'okukwatibwa nga bafeze omwana w’essomero, Shakira Akankwase, ne bamuggyako ensimbi emitwalo 10  ze babadde bamutumyemu ngatto.

Difensi Mwanje Ng'aggyawo Nankanja Abatuuze Gwe Baabadde Baagala Okugajambula.

 Pascal Nyanzi 60, ne Sandra Nankanja 40, okukwatibwa kyaddiridde omu ku batuuze okubasanga  nga bakaayana ne Akankwase nga abalemeddeko okumudizza ensimbi ze.

Abatuuze baakubye enduulu eyasombodde abalala era ababiri bano ne babatwala ku ofiisi ya ssentebe w’ekitundu kino. Bino okubaawo kigambibwa nti baasoose kulaba muwala nga yeetala n'omukadde nga amutwala ku dduuka erimu mu kitundu ekyo.

Empapula Za Mawulire Ezaasangiddwa N'abafere Nga Bazizinze Nga Ssente.

Olwabatuusizza ku ofisii baasoose kwegaana eby’okuggyako omwaa ensimbi wabula olwabayisizzaamu empi ne bakkiriza kyokka ne  bategeeza nti tegyabadde mitwalo 10 wabula gwabadde mutwalo gumu.

Mu kubaaza baabasanze n'empapula za mawulire ssaako sitookisi enkadde n’obuveera mwe bazinga ebipapula n'ebyefananyiriza ssente bye beeyambisa okufera abantu.

Difensi w'ekitundu kino, Abbey Mwanje we yatuuse amanye ogubadde kyokka obwedda abatuuze baswakidde nga tebamuganya nga baagala abawe abafere bano babayiseemu ensambaggere.

Nyanzi Ne Nankanja Abaakwatiddwa Nga Bafera Omuyizi.

Akankwase yagambye nti Nankanja yamusanze n’amubuuza ky’anoonya kwe kumugamba nga bwamanyi amaduuka amalungi mu Bwaise wabula nti bwe baabadde batambula yamusabye ensimbi azikwate mu ngalo nga ziri mu kaveera ng’amukakasizza nti edduuka we baabadde bagenda kuliko omukuumi atakkiriza bantu na nsawo zaabwe wabula ne ssente zokka ng’ozisibye mu kaveera.

Akankwase yakutte akaveera Nankanja ke yamuzingiddemu ssente n'akateeka mu nsawo wabula bwe baatuuse mu kkubo n'asalawo okukebera ku sente ng’alina bipapula bw’atyo n'ayita abatuuze abaamuyambyeko okukwata ababiri bano.

Abakwate baasabye abatuuze babasonyiwe nga bagamba nti gwe gwabadde omulungi gwabwe ogusooka okufera. Abatuuze baasabye poliisi okubakangavvula kubanga muzeeyi babeera baakamukwata ng’avaayo.

Difensi Mwanje yavumiridde nnyo ebikolwa by'obufere ebisukkiridde era n'asaba abantu abakuliridde mu myaka okwewala emize nga gino kubanga gibeera gya bavubuka. Abafere baggyiddwawo ne batwalibwa ku poliisi y'e Kawempe okuwona okugajambulwa.