Iran ereese obukodyo obupya mu lutalo

IRAN ereese obukodyo obupya mu lutalo lwayo ne Yisirayiri, ekyongedde okuzibuwaza ekibalo kya Yisirayiri ne America, okuwangula olutalo luno nga tebafiiriddwa nnyo bantu baabwe n’okwonoona ebintu.
Iran yasabuukuludde mizayiro empya gy’ebadde tekozesangako eyitibwa Hajji Qassem edduka emisinde emiyitirivu ennyo, ezibuwalidde tekinologiya wa Yisirayiri abaka mizayiro, ekivuddeko ebizimbe bingi okusesebbulwa, n’abantu ba bulijjo ne bafa, naddala mu kibuga Tel Aviv ne Haifa.
Mizayiro eno eya Hajji Qassem edduka mayiro 870, nga yetisse bbomu ezitowa kkiro 500. Baagikola ng’erina obusobozi obukuba tageti nga tetambulidde ku tekinologiya wa yintanenti owa GPS era eggulo mizayiro eno yakubye ekitebe ky’ekitongole kya Yisirayiri ekikessi ekya Mossad okusinziira mukutu gw’amawulire ogwa Tasnim okufulumira mu ggwanga lya Iran.
Iran yeewanye nti okumanya mizayiro eno nkambwe nnyo, yasobodde okwabuluza tekinologiya wa Yisirayiri abaka mizayiro ow’emirundi esatu okuli Iron Dome, David Sling, kw’ossa Arrow 1 ne Arrow3, n’ekuba ekitebe kya Mossad.
Wabula Yisirayiri tennaba kubaako ky’eyogera ku mawulire gano, naye nga kimanyiddwa nti amawulire waliwo ebifo gavumenti ya Yisirayiri byetagakkiriza kutuukamu nga bikubiddwa.
Akakodyo akalala Iran keekozesa, kwe kusindika ennyonyi ennwaanyi ezeevuga zokka nga zisitudde bbomu mu bungi, era tekinologiya wa Yisirayiri bw’atandika okubaka ennyonyi zino, nga Iran esindika mizayiro nga nnyingi, ekiziyamba okuyitawo ne zikuba munda mu Yisirayiri.
TRUMP ALAGIDDE ABANTU OKWAMUKA TEHRAN
Pulezidenti wa America Donald Trump olwavudde mu lukiiko lw’ensi engagga olwa G7 olwatudde e Canada, yazzeemu okusaba Iran nti edduke mangu ku mmeeza bateese ku ngeri gy’egenda okuva ku by’okukola bbomu za nukiriya eryoke ewone obuswandi bwa Yisirayiri.
Trump yagambye nti olutalo luno Iran tesobola kuluwangula, ng’egenda kuviirako abantu baayo bangi okufiira obwereere, buli gyenaakoma okugaana okutuula ku mmeeza.
Ng’ayita ku mukutu gwe ogwa X, Trump yagambye nti kye kiseera abantu ba bulijjo okwamuka ekibuga Tehran kubanga kyonna kigenda kufuuka muyonga mu bbanga ttono.
Omukutu gwa BBC gwafulumizza amawulire eggulo nti akalippagano k’ebidduka kaabadde ka maanyi ku nguudo ezifuluma Tehran, ng’abantu ba bulijjo bagezaako okwetegula ekibabu. Wabula waliwo n’abaalemeddemu nga bagamba nti tebalina wa kuddukira kubanga mu kyalo tebasobola kufunayo buweereza naddala obw’obujjanjabi.
Yo Yisirayiri yalabudde abantu abasoba mu mitwalo 30 mu masekkati g’ekibuga Tehran nti bave mangu mu kitundu kino kubanga bagenda kuwandagazaawo bbomu ez’omutawaana.
OMUKAMBWE WA IRAN ATTIDDWA
Yisirayiri eggulo yafulumizza amawulire g’okuttibwa kw’omukambwe Ayatollah gw’abadde yaakalonda okudda mu bigere by’omuduumizi w’amagye eyattibwa ku lunaku olusooka olw’olutalo luno, Gen Ali Shadmani.
Shadmani ekifo kino akimazzeemu ennaku ssatu zokka era yeegasse ku banne Yisirayiri besse okuli abadde omuduumizi w’amagye ga Iran aga Islamic Republic of Iran Armed Forces Maj. Gen. Mohammad Bagheri, abadde omudduumizi w’ekibinja ky’amagye ekikola ebikwekweto eby’enjawulo ekya Islamic Revolutionary Guards Corps Gen. Hossein Salami, omumyuka w’omuduumizi w’amagye Gen. Gholamali Rashid, abadde adduumira amagye ag’omu bbanga Gen. Amir Ali Hajizadeh, abadde amyuka akulira ekitongole ky’amagye ekikessi Gen. Gholamreza Mehrabi, n’abadde amyuka omuduumizi w’ebikwekweto eby’enjawulo Gen. Mehdi Rabbani.
We bwazibidde eggulo nga tewali kabonero kalaga nti okulwanagana kunayimirira, kubanga buli ludda lubadde luwawula bbomu na mizinga nga bwe luteekateeka abatuuze babe bagumu mu mbeera eno ey’akasambattuko