'Mwegendereze nga mukola ebinaabayamba okwetangira Ebola'
SSAABAKUNZI wa NRM, Rosemary Ssenninde asabye abantu okubeera abeegendereza nga bagezaako okukola ebintu ebibayamba okwetangira obulwadde bwa Ebola kubanga bweyongedde ate butta.
'Mwegendereze nga mukola ebinaabayamba okwetangira Ebola'
By Sarah Zawedde
Journalists @New Vision
Ssenninde yabadde ku mukolo abaami abafumbo mu Bussaabadinkoni bwa Gayaza mu Bulabirizi bw’e Namirembe bwe baabadde bakwata olunaku lwabwe olwa Peteero ku Kkanisa e Wampeewo ku Ssande.
Abamu ku bannaddiini abaabadde ku mukolo ; Marion Muwanguzi (owookubiri ku kkono), Ssenninde, Rev. Fredrick Lubega, Zephania Ssenninde n’abalala.
Muky. Marion Muwanguzi ye yabadde omugenyi omukulu. Yawerekeddwaako bba Rev. Can Geoffrey Muwanguzi, Provost wa Luweero. Muky. Muwanguzi yavumiridde abaami abatafaayo ku baana baabwe n’agamba nti abaana buvunaanyizibwa bwa bazadde bombi okulaba nga tebayonooneka.
Mmeeya Muwonge ne mukyala we nga boogera.
Ate Rev. Fredrick Lubega, omukwanaganya w’ekibiina kya Father’s Union mu Bussaabadinkoni bw’e Gayaza (ekibiina ekigatta abaami abafumbo) yatongozza okusonda ensimbi obukadde 40 ezigenda okugula emmotoka y’ekibiina.
Geoffrey Kulubya, omukubiriza w’Abakristaayo mu Bussaabadinkoni bw’e Gayaza yasabye ab’ekkanisa y’e Wampeewo eyagala okufuulibwa obusumba eve mu Busumba bw’e Masooli, okusooka okutuukiriza ebisaanyizo omuli okulaga nti basobola okulabirira Omusumba n’omubuulizi n’emisoso emirala bulyoke butongoze bwe .
Sseninde ng'awayaama ne Kulubya, eyaliko omukung'aanya wa Bukedde ow'oku ntikko.
Ssaalongo Henry Mwanja, ssentebe wa Father’s Union mu bussaabadinkoni bw’e Gayaza yagambye nti abaami abafumbo 25 baayingiziddwa mu kibiina era ne bakwasibwa satifikeeti zaabwe. Baasaze kkeeki eyaweereddwaayo Obusumba bw’e Masooli.