Muntu asuubizza ab'e Adjumani empeereza ennungi n'okubaggya mu bwavu

RT.Major.Gen.Mugisha Muntu agumizza abantu abawangaalira mu bitundu ebirimu Abanoonyi b'Obubudamu abangi nti gavumenti ye waakufuba okulabanga bafuna obuweereza obulungi.

Muntu ng'ayogerako eri abalonzi

Kino kiddiridde abantu mu disitulikiti ya Adjumani emu ku zikyasinze okubeera n'Omuwendo gw'Abanoonyi b'Obubudamu abangi okumulaajanira ku mbeera mwe bawangalira omuli; Amalwaliro omutali ddagala, amasomero n'ebirala.

Muntu bw'abadde asaggula akalulu mu ggombolola y'e Dzaipi mu disitulikiti ya Adjumani agumizza abantu abawangaalira mu  disitulikiti ezirimu  n'Abanoonyi b'Obubudamu nti bwe bamulonda ku bwapulezidenti waakukola kyonna okulabanga ensonga y'abanoonyi b'obubudamu enogerwa eddagala.

Eno Muntu era asuubizza nti gavumenti ye yaakufuba okulabanga disitulikiti ezirimu abanoonyi b'obudamu zifuna obuweereza bwa gavumenti bwonna obwetaagisa.

Omu ku bantu b'e Adjumani ng'ayogera ne Muntu

Abantu ba Adjumani era balaajanidde Muntu ku Lutindo olugatta Adjumani ku Moyo nga bagamba lwayonooneka ekibakaluubiriza entambula ekisannyalazza eby'obusuubuzi mu kitundu kyabwe n'abagumya nti bwebamuwa akalulu wakulubakolera.

Bo abazadde beekkokodde abakulira amasomero ga gavumenti mu kitundu be bagamba nti basusse okubasaba ssente ne basaba Muntu  nti bw'akwata obuyinza abakolere ku kizibu ky'okusasulira Amasomero ga gavumenti n'abagumya nti waakukikolako.

Abamu ku bawagizi be abaadde ku kkubo n'ebifaananyi bye

Abalala balaze obutali bumativu olw'emisoso emiyitirivu egyassibwawo okufuna Endagamuntu z'eedgwanga nga bagamba nti bangi zibalemye okufuna ne bamusaba nti bwe bamulonda agikendeezeko n'abakakasa nti ajja kukitereeza.

Yo mu disitulikiti y'e Moyo abavubuka bamulaajanidde ku bbula ly'emirimo erisusse n'abagumya nti bw'akwata obuyinza waakubateerawo Pulogulaamu ez'enjawulo ezinaabasobozesa okwekulaakulanya.