Minisita Kasolo atadde obuwumbi busatu mu SACCO ya Taxi

MNINISITA wa Microfinance Hajji Haruna  Kasolo awadde aba takisi obuwumbi busatu mu SACCO yaabwe basobole okuzeewola ku magoba amatono kibayambe okugula mmotoka ezitiika abantu 21 okuva kuza abantu 14.

“Nze bulijjo nneewunya ba ddereeva ba takisi lwaki mulemereddwa okugaggawala nga ate muli bawagizi ba gavumenti ya NRM ne mulemwa okukozesa omukisa guno okututtukkirira ne tubawoola ensimbi ku magoba amatono ne musobola okwekulaakulanya ne muva mu bwavu naye kemukitegedde nnange kantandike n’okubagezeesa n’obuwumbi busatu  bwentadde mu SACCO yamwe eya “Kampala Public Transporter’s Sacco”.

Ayongeddeko nti omulimu gwa takisi abagusookamu bali bagwonoona nga bwoyogera ku mugoba wa takisi abantu baabamaanyiiko kimu kwaggala kuzaala baana bangi nakuwasa bakazi bangi naye bwemubeera mukyusizaamu mu nkola yamwe mbaniriza era  katutandikire awo.

Minisita Kasolo ng'ali mu office z'abakulembeze ba Taxi

Minisita Kasolo yawadde aba takisi amagezi nti minisitule ye yandibawadde ssente ezisinga obuwumbi obusatu bw’agenda okubaawa mu SACCO yaabwe kyokka balina okusooka okuyiga okweterekeera gamba singa ba mmemba ba SACCO ya takisi eno 2500, batandika okwetereekera nga buli lunnaku 10,000/= gwokka olunnaku babeera batereeka  obukadde 25, wiiki bwe bukadde 125, ate omwaka  bwe buwumbi mukaaga [6] kati lwaki munnaddamu okwewola ssente za bbanka ez’amagoba.

            “Kino bwe munakikola emyaka ebbiri mugenda kubeera namwe mwetandikiddewo bbanka yamwe nga mwewoleera ku magoba amatono ddala oluvannyuma nga mutandika nakukwata ttenda za gavumenti gamba nga okuyoola kasaasiro mu kibuga Kampala ne mwongera ku nnyingiza ya SACCO yamwe” Kasolo bweyategezezza.

 Ssentebe w’ekibiina kya UTOF ekitwala omulimu gwa takisi mu  Uganda Rashid Ssekindi agambye nti takisi balina ba ddereeva abasukka emitwalo 20, kyokka abantu abalya ku takisi awamu basukka obukadde omukaaga mu ggwanga.

            “Tulina siteegi za takisi 200 mu ppaaka z’omu Kampala zokka ezigenda mu disitulikiti 103” Ssekindi bwategeezezza.

            Yagambye  nti abbanga lyonna abantu ab’enjawulo bazze balwanyisa omulimu gwa takisi ne batuuka n’okwagala okututwakako ppaaka yaabwe enkadde nga beguzizza mu polooti  kyokka Pulezidenti Museveni bwetwamutuukirira nabayimiriza era naddamu nagiddabiriza  kati lwaki tetumuwagira akomewo ku bwa Pulzedenti atumaanyidde ennaku yaffe.

Minisita Kasolo ng'ayogera n'abakulembeze ba Taxi

 Museveni bweyagasseeko ekky'okutuggyirawo ebipapula bya kkamera za poliisi bye baabadde batandise okutukuba kyatuwaliriza n’okuyungula  ekibinja kya ba ddereeva baffe 1200, okwetoloola Uganda yonna okutandika okunoonyeza Museveni akalulu  era ye nsonga lwaki twatongoza offiisi ya NRM mu Kampala ku kizimbe kya Nalubwama egenda okumunoonyeza akalulu ka 2026.

Offiisi eno egguddwawo minisita Kasolo ne meeya wa Kampala Central era ssentebe wa NRM mu Kampala Salim Uhuru eyabagulidde T.V kwe banalabira nga ebigenda mu maaso n’abaawa n’emitwalo 50