Bbanka etutte amayumba ga BMK

BBANKA etutte emmaali y’omugenzi Bulaim Muwanga Kibirige ‘BMK’ e Buziga lwa
bbanja lya buwumbi 10.
Emmaali eyatwaliddwa mulimu ebizimbe nga bina ebya kalina ez’emyaaliro 6 ez’amayumba ag’ebbeeyi agapangisibwa eza ‘Africana Hotel Apartments’, ezisangibwa ku Block 273 Plot 46 ku Mulambula Road mu zzooniya Buziga Hill View mu munisipaali ya Makindye mu Kampala.
African Hotel Apartments zitwaliddwa bbanka eyitibwa YAKO Bank eyawaaba ng’eyagala aba BMK baamuke ekifo lwa kulemwa okusasula obuwumbi 10 ezigambibwa okwewolebwa aba Ffamire ya BMK mu bbanka eyo.
Ssente kigambibwa nti zewolwa mutabani ba BMK Haruna Kalule Muwanga n’asinga ekyapa ky’ettaka nga kiri mu mannya g’omugenzi BMK kyokka aba ffamire bagamba nti Kalule yajingirira omukono gw’omugenzi  ’ekyapa mu biwandiiko bye
yatwala okufuna ssente.
Ali Kibirige Muwanga omusika wa BMK abadde alwana okulaba ng’emmaali ya kitaabwe tetwalibwa kyokka kkooti ejulirwamu yagobye okusaba kwe n’ekkiriza
bbanka okubitwala.

BMK

Bukedde we yatuukidde ku bizimbe bino nga kuwandiikiddwaako bigambo; ‘BANK PROPERTY’, ekitegeeza nti Bbanka y’erina obwannannyini ku bizimbe ebyo .
Ssentebe wa Buziga Hill View, Joseph Nyangezi yategeezezza nti wiiki ewedde nga April 16, 2024 abantu baamweyanjulidde nti bavudde mu YAKO bbanka nga bakulembeddwamu akulira poliisi y’e Buziga, Peter Mubiru ne bamutegeeza nga bwe bazze okuteeka ekiragiro kya kkooti mu nkola.
Nga bali wamu ne LC, poliisi n’aba bbanka bakkaanya obutataataaganya bapangisa basangiddwa mu nnyumba ezo wabula abapangisa baalagiddwa kusasula ssente wa BMK nga bagenda kutegeezebwa eby’ensasula ng’embeera eteredde.
Nga March 9,2023 bwe baali ku ofi isi z’ebyettaka, Kibirige yategeeza omulamuzi Stephen Mubiruowa kkooti ewulira emisango gy’ebyobusuubuzi e Nakasero nti Kalule yajiringira omukono gwa kitaabwe era byatwalibwa ne bikeberebwa ne kizuulibwa nti ddala yagujingirira. Kibirige yalemerako nti emmaali eno ya kitaabwe era tetundibwangako.
BALWANA KUNUNULA MAKA GA BMK
Bino we bijjidde nga AliKibirige alwana bwezizingirire mu kkooti y’ebyobusuubuzi okununula emmaali ya kitaawe endala esangibwa ku Plot 15 Upper Nagguru okuli amaka ga BMK ng’eno Equity Bank yeeyayagala okugitwala. Amaka gano gabalirirwamu obuwumbi bubiri. BMK yafa nga September 10, 2021 mu ddwaaliro lya Aga Khan e Nairobi oluvannyuma lw’okulwana n’ekirwadde kya kkansa okumala ebbanga.

Mutabani we Ali Muwanga Kibirige yeyamusikira era y’avunaaninyizibwa ku bintu
by’omugenzi ku lwa banne. Kibirige yaddukira mu kkooti ng’awaabira Haruna
Kalule Muwanga, YAKKO bank ne kamisona avunaanyizibwa ku kuwandiisa ettaka ng’agamba okukyusa ekyapa ky’ettaka eryo n’okweddiza ebintu bya BMK byakolebwa mu ngeri ya kifere era emenya amateeka n’asaba kkooti ebisazeemu  emmaali eyo.
Muwanga yabadde awolerezebwa munnamateeka Adam Kirumira.
Omwogezi wa ffamire ya BMK, Hajji Isaac Ngobya yagambye  yategeddeko nti aba bbanka baatadde ebiwandiiko ku nnyumba za BMK e Buziga kyokka
ensonga bannamateeka baabwe bazitambuza kubanga kyakakasibwa bulungi nti Haruna Kalule yajingirira omukono gw’omugenzi.

Ngobya yagambye nti amabanja ga BMK bagamanyi era temuli ga YAKO bank na ba Equity Bank nga baakolagana n’omwana okutwala ebintu by’omugenzi kyokka tebajja kukkiriza bintu bya ngeri eyo.