Sheikh Ndirangwa aweereddwa ekitanda mu ICU e Mmengo! Muyi!

EYALI Supreme Mufti, Sheikh Siriman Kasule Ndirangwa aweereddwa ekitanda mu kasenge k'abayi mu ddwaaliro e Mengo.

"Embeera ya Sheikh Ndirangwa mbi ddala, tusaba Abasiraamu okumussa mu dduwa Allah amussuuse," omu ku baffamire (amannya gasirikiddwa) bwe yategeezezza Bukedde. Ndirangwa aludde ng'ataawanyizibwa obulwadde era gye buvuddeko yatwalibwa mu America gye yamala ebbanga eddene ng'ajjanjabwa.

Sheikh Siraje Mudde, omu ku bakulembeze b'Obusiraamu e Kibuli yasabye buli Musiraamu okuteeka Sheikh Ndirangwa mu dduwa, Allah amussuuse.

"Twakola naye ebbanga eddene nga omukulembeze waffe, wadde wayinza okubaawo ebyasoba, Omubaka Muhammad yatugamba okusonyiwagana noolwekyo nsaba tumusabire nnyo," Sheikh Mudde bwe yagambye.

Yagambye nti ebbanga lye yamala ne Sheikh Ndirangwa mu buweereza, yamuzuulamu ekirabo ky'obwetoowaze eri buli muntu n’amwagaliza okussuuka obulungi.

Yasabye abo abalina akadde okuyitako mu ddwaaliro bamulambuleko nti bwe baba tebafunye mukisa gumulaba waakiri bawandiike mu kitabo ky'abagenyi kuba Obusiraamu bukubiriza okulambula abalwadde.

Mu kiseera kye kimu ne Khalifa w'ennyimba z'amataali Haji Ahmada Mukasa yaddusiddwa mu ddwaaliro e Kibuli bwe yabadde yaakadda okuva e Mecca ng'ali bubi.