Poliisi ekutte abadde afera abeewandiisa okuzza obuggya densite

POLIISI y’e Busega ekutte abadde aggya ssente ku basuubuzi ng'abawa ffoomu enfu ng'abakutte obujega nti zaakubayamba okuzza obuggya densite.

Ronald Kasiita 40, omutuuze w'e Busega Kibumbiro, kigambibwa nti abadde yagumba mu katale e Busega ng'abantu abasaba 5,000/- n'abamu 10,000/- buli omu okubaguza ffoomu ez'okukozesa ku kuzza obuggya densite.

Abasuubuzi baabadde bamweyunira kuba buli lwe babadde nga batuuka ku mmeeza z'aba NIRA abakola ku bya densite mu Busega, nga babagamba nti ffoomu ziweddewo banoonye we bazifuna balyoke bakolweko.

Kasiita we baamukwatidde nga kigambibwa nti abadde yakaggya ku bantu abasoba mu 50 ssente kyokka nga bwe batuuka mu NIRA nga ffoomu z'abawa zigaana okukola. Yasangiddwa ne ffoomu 40 ze yabadde alinze okuguza bakasitoma be.

Omu ku basuubuzi eyanyagibwa Evas Musoki, olulabye Kasiita ng’akomyewo atandise okuggya ku balala ssente, n’addukira ew'abakulira akatale okwemulugunya.

Akulira akatale kano, Vanansio Natuhwera yakubidde poliisi y'e Busega essimu eyatuuse ne bamutega omuntu omulala, n’amuggyako 10,000/- n’amuwa ffoomu enjokeseemu era n’akwatibwa.

Atwala poliisi y’e Busega, Brian Namanya azze mu katale okwogerako n'abasuubuzi, okubalabula obutawa muntu yenna ssente kuba empapula NIRA yokka y’erina okuzibawa, ate n'abawaayo ssente nabo bazza musango era nabo baakukwatibwa bavunaanibwe kuba bakimanyi bulungi nti entegeka y'okuwandiisa abantu ya bwereere.

Eyakuliddemu okuwandiisa e Busega, Adam Kalulu yategeezezza nti, NIRA erina enkola bbiri zokka okubawandiisa omuli; okujjuza ffoomu n'okwewandiisiza ku mutimbagano n’abasaba beewale abafere.