Balaajanidde Minisita Wamala ku kisamba ekyazinzeeko omwalo gw'e Busaabala
Wabula ekisinze okubeeraliikiriza kye kisamba ekizinzeeko ekitundu ku mwalo amaato we gagobera, abavubi kye bafudde kabuyonjo olw'okubulwa ttooyi mu kitundu.
Balaajanidde Minisita Wamala ku kisamba ekyazinzeeko omwalo gw'e Busaabala
By Bukedde Omusunsuzi
Journalists @NewVision
ABAKULEMBEZE b'e Busaabala mu ggombolola ya Makindye Ssaabagabo balaajanidde minisita avunaanyizibwa ku by'enguudo n'entambula okubayamba okuggyawo ekisamba ekyazinzeeko ekitundu ku mwalo gw'e Busaabala amaato we gagobera.
Abakulembeze bino byabyogeredde Busaabala ku mukolo gwa Bulungibwansi ogutongozeddwa aba Lotale 'club' y'e Busaabala, okuyonja ekitundu kino.
Eyaliko gavana wa Rotary owa district 9214, Ken Wycliffe Mugisha y'atongozza Bulungibwansi, abatuuze ne bannalotale mwe bayonjerezza akabuga k'e Busaabala n'omwalo. Gavana Mugisha akubirizza abazadde okuwa abaana obudde nga babatendeka mu nkuza ennungi n'okubayigiriza okubeererawo abalala.
Ssentebe w'ekitundu kino, Ntuyo Stephen aloopedde bannalotale ebizibu bye balina naddala obukyafu n'okubulwa kabuyonjo ku mwalo ng'abatuuze abamu n'abavubi obubi babumansa buli we basanze. Ntuyo asabye bannalotale okubakwasizaako okubazimbira kabuyonjo ey'omulembe ku mwalo.
Gavana Mugisha asuubizza abatuuze b'e Busaabala nga bwe bagenda okukwatagana ne 'Club' ezitandiisewo 'Rotary' y'e Busaabala okuli eya Konge Lukuli, Bunga, Ggaba ne Buziga okubatuusaako obuyambi bwe beetaaga omuli ne kabuyonjo. Ono era abasabye okukwatagana ne Kanso okulaba nga bakung'aanya kasasiro mu kitundu kyabwe.
Sylivia Miwanda, pulezidenti wa 'club' ya Busaabala agambye nti bannalotale balabye obwetaavu mu kitundu, mu by'obuyonjo ng'abantu tebalina we bayiwa kasasiro nga kino kisobola okuleetawo endwadde kwe kusalawo bakwasize wamu okuyonja ekitundu kyabwe. 'Club' nnya (4) ezitandiseewo lotale y'e Busabala ziwaddeyo ebigoma omugenda okukung'aayozibwamu kasasiro. Ruth Kalembe, munnalotale okuva e Busaabala asiimye enteekateeka eno.
Wabula ekisinze okubeeraliikiriza kye kisamba ekizinzeeko ekitundu ku mwalo amaato we gagobera, abavubi kye bafudde kabuyonjo olw'okubulwa ttooyi mu kitundu.
Amyuka ssentebe wa Busaabala Sseguya Constantine wano w'asinzidde n'akubira minisita avunaanyizibwa ku by'enguudo n'entambula omulanga okubayamba okuggyawo ekisamba kino.
