Amagye ne Poliisi gataasizza eyawambye omuwala ng'ayagala kumusobyako

Abatuuze  baakutte emiggo n’ebiso ne bayingira ensiko  okutaasa omuwala ekitaasoboose kyokka oluvannyuma amagye ne poliisi baayingiddewo  ne beegatta ku batuuze okusaggula ensiko nga wano omuvubuka  eyagambye nti ye  Wilber n'afubutuukaayo mu nsiko n'adduka kiwalazzima olwo abatuuze ne  bamusimbako  olwamukutte ne bamukuba bubi nnyo ekyawalirizza amagye okukuba amasasi mu bbanga  okubangumbulula.

Wilber Nga Bamunywezezza

Wilber kaggwensonyi eyasimattuse okuttibwa

Teopisita Twikirize (25)  eyabadde ne Natukunda eyawambiddwa  yagambye nti bakolera Kyanja nga Natukunda  atunda nnyaanya n’obutungulu  ate ye atunda mmamba ng’okumuwamba  baabadde bava ku mulimu bwe baatuuse ku  kikubo  eky’omu nkoko ku luguudo lw'e Gayaza  omuvubuka eyabadde ayambadde ekikoofiira ku mutwe  n'engoye enzirugavu yamukutte omukono n'amwesikambulako  we yakwatidde Natukunda .

Abatuuze Nga Bakunganye (2)

Yayongeddeko nti  nga bamaze okumuyingiza ensiko yamukubidde essimu n'agikwata ng’akaaba naye ng’eddoboozi terivaayo ng’omuvubuka bw'amugamba  nti  asirike bw'aba tayagala kumutta, essimu baagenze  okuddamu okugikubako ng’envuga naye nga tagikwata ne beekendera kwe kulaya enduulu eyasombodde abantu ne Poliisi.

Luke Owyesigyire omwogezi wa poliisi mu Kampala n’emiriraano yategeezezza nti waliwo abantu babiri abaakwatiddwa ne baggulwako omusango gw’okuteega omuntu ne bamubba  nga balinda omuwala  akakase nti beebo.

Wilber Eyakwatiddwa (4)

Oluvannyuma nga Wilber  amaze okukwatibwa yatwaliddwa ku poliisi ye Kasangati abasirikale n’abatuuze baazzemu okuyingira ensiko n’etooki okunoonya  Natukunda ng’ono oluvannyuma poliisi yamusanze mu muzigo gwe e Kitettika ku lwe Gayaza .

OMUWALA AZUUSE N'ALOJJA BYE YAYISEEMU

Florence Natukunda eyasimatuuse okuttibwa anyumizza: Omuvubuka bwe yansikambudde n'annyingiza ensiko.

Natukunda Eyasimatuuse Okusobezebwako

Natukunda ng'anyumya

Yankutte mu bulago n'agezaako okumulwanyisa naye ng’alina amaanyi amazima n'awunzeemu kuba abantu okusamba ensiko nga bannoonya nze saabaawulidde  wabula omuvubuka yabadde agenda kunsobyako we yalabidde kabangali ya poliisi n'anta n'adduka .

Bwe yadduse nange nadduse kiwalazzima okutuuka ewange gye nnawuliridde amasasi nga gavuga ku ssaawa 7 ez’ekiro abasirikale bazze ne mukwano gwange Twikirize ne bamumbuuza ebyabaddewo ne mbannyonnyola.

Amazima singa teyabadde poliisi ogubuvubuka gwabadde gugenda kunsobyako kuba yabadde atandiise okunzigyamu empale, yadde nnamulemesezza okutwala essimu naye ssente emitwalo 10 zo yazitutte .