Akulira Abasiraamu e Mukono asabye Pulezidenti Museveni okuyingira mu nsonga z’Abasiraamu ne Mufti Mubajje

Abasiraamu e Mukono bajjumbidde okusaala kwa Iddi Aduha ku Muzikiti gwa Masjid Atiq mu kibuga Mukono.

Abasiraamu nga bawuliriza kkutubba okuva ewa Sheikh Ssenyonjo. Ow'okusatu ku kkono, Sheikh Ssenkuba, ddisitulikiti Kkaadi w'e Mukono.

Sheikh Abdul Majid Ssenyonjo y’asomye kkutubba oluvannyuma lw’okusaala n’avumirira Bannayuganda abakyalina endowooza y’okusaddaaka abantu ky’agambye nti kikyamu.

Ssentebe w’Abasiraamu mu disitulikiti y’e Mukono, Hajji Haruna Ssemakula asinzidde wano n’asaba Mufti wa Uganda Sheikh Shaban Ramathan Mubajje okuwa Abasiraamu ekirabo akkirize abaddize obukulembeze bwabwe oluvannyuma lw’okuweza emyaka 70 egiragiddwa abakulembeze Abasiraamu kwe balina okuwummulira.

Abamu ku Basiraamu abazze okusaala Idd.

Hajji Ssemakula, nga ye ssentebe w’ekibiina kya NRM mu disitulikiti y’e Mukono omulonde, ategeezezza nti kye kiseera ssentebe wa NRM mu Uganda, Gen. Yoweri Kaguta Museveni okutuuza Mubajje n’Abasiraamu alabe nga bawona enjawukana zino ezibaswaza ng’eddiini y’Obusiraamu.

Ye disitulikiti Khadhi w’e Mukono, Sheikh Abbas Ssekumba Ssonko, naye agambye ku bakulembeze okwewala okutulugunya abantu be bakulembera.

Ono era awadde n’abazadde amagezi okukoma ku baana baabwe ng’anokoddeyo abamabala mu nnyambala etaweesa kitiibwa.