Abanaasikira Liz Truss ku kya Katikkiro wa Bungereza batandise okwesowolayo

Bya Wilson Ssemmanda

OMUWENDO gw'abantu abaagala okudda mu kifo kya Katikkiro wa Bungereza (UK) Liz Truss kye yalekulidde gweyongeddeko kyokka ng'eyaliko Katikkiro Boris Johnson ali mu kifo kya ku mwanjo okudda.

We bwakeeredde ku Lwokutaano ng'ababaka ba Palamenti ya Bungereza abaabadde emabega w'okugwa kwa Truss baatandise dda okulaga obuwagizi eri abantu ab'enjawulo be bandyagadde okulya Obwakatikkiro ng'akyakulembedde aboogerwako ye Boris Johnson , Truss gwe yaddira mu bigere.

Kigambibwa nti ekiro ky'Olwokuna Johnson yakimazeeko ng'akuyega babaka b'ekibiina kye ekya Conservative party omuli ne gw'asuubira okuvuganya naye - Rishi Sunak  ng'amusaba amuwagire akomerewo mu maanyi.  

Johnson agamba nti ye yekka asobla okuwangula  Sir Keir Starmer owa Labour Party kyokka yeetaaga okusooka okubeera n'obuwagizi bw'ababaka waakiri 100.

Ssinga Boris Johnson akomawo ajja kuba afuuse omuntu owookusatu okulya Obwakatikkiro emirundi egisukka mu gumu ng'adda ku Winston Churchill ne Harold Wilson owa Labour Party. 

Boris Johnson yakakibwa okulekulira ekifo kino mu July w'omwaka guno oluvannyuma lw'ababaka ne Baminisita okumukyukira ne bamukaka alekulire olw'okwetaba ku bubaga mu kiseera ky'omuggalo ye kennyini gwe yateekawo mu kiseera kya Covid19. Kuno kw'ossa okulonda okulonda Chris Pincher okubeera omumyuka wa nnampala wa Gavumenti mu Palamenti, omuntu gwe yali amanyi nti bannansi baali batutte ebbanga nga beemulugunya ku nneeyisa ye.

Kigambibwa nti we bwakeeredde ku Lwokutaano, Boris yabadde awezezza ababaka 50 abasazeewo okusimba mu mugongo gwe.

Suella Braverman

Rishi Sunak: Ono y'omu ku baavuganya ne Truss mu kaweefube w'okusikira Boris Johnson. Bwe yali akuba kampeyini yalabula Abangereza nti Truss ebirowoozo bye yali aleeta okuzza engulu ebyenfuna bya Bungereza byali bya bulabe era byali tebijja kukola kyokka bannakibiina kye tebaamulonda n'awangulwa ku bululu 21,000.

Sunak yafuuka omubaka mu Palamenti mu 2015, ng'akiikirira ekitundu kya North Yorkshire Constituency, yaliko Minisita w'ebyensimbi era munnabyanfuna omukuukuutivu.

Penny Mordaunt

Mu balala aboogeddwaako mulimu: Penny Mordaunt, yaliko Minisita wa Bungereza ow'ebyokwerinda (oye mukazi eyasooka) mu 2019 era yaliko Minisita w'ebitongole by'ebyokwerinda mu Gavumenti ya David Cameron.

Ben Wallace: Ono ye Minisita w'ebyokwerinda owa Bungereza ng'ajjukirwa nnyo olw'okukulemberamu ekya Bungereza okusindika obuyambi eri Ukraine bwe yali yaakalumbibwa Russia.

Kemi Badenoch

Kemi Badenoch: ono mubaka mu Palamenti akiikirira Saffron Walden era akulira ebyobusuubuzi bwa Bungereza n'amawanga amalala.

Suella Braverman:TOno y'abadde Minisita w'ensonga ez'omunda kyokka kigambibwa nti y'omu ku baavuddeko Truss okulekulira kubanga bwe yalekulidde ne Truss n'alekulira mu ssaawa 24 zokka.