Boris Johnson akomyewo mu lwokaano lwa Katikkiro
OMUWENDO gw'abantu abaagala okuddamu kifo kya Katikkiro wa Bungereza ekibaddemu Liz Truss eyalekulidde gweyongeddeko nga n'eyaliko Katikkiro Boris Johnson akomyewo.
Boris Johnson akomyewo mu lwokaano lwa Katikkiro
By Bukedde Omusunsuzi
Journalists @NewVision
Liz Truss yalekulidde oluvannyuma lw’okukitegeera nti, ababaka ba Palamenti baabadde bamaze okuluka olukwe olumuggyamu obwesige. Ono ye Katikkiro wa Bungereza agenze mu byafaayo by’eggwanga afugidde ekiseera ekitono ddala eky’ennaku 44 zokka.
Kigambibwa nti ekiro ky'Olwokuna Johnson yakimazeeko ng'akuyega babaka b'ekibiina kye ekya Conservative Party omuli ne gw'asuubira okuvuganya naye Rishi Sunak n'amusaba amuwagire akomerewo mu ofiisi.
Johnson agamba nti ye yekka asobla okuwangula Sir. Keir Starmer owa Labour Party kyokka yeetaaga okusooka okubeera n'obuwagizi bw'ababaka waakiri 100.
Singa akomawo ajja kuba afuuse omuntu owookusatu okulya Obwakatikkiro emirundi egisukka mu gumu ng'adda ku Winston Churchill ne Harold Wilson owa Labour Party.
Boris Johnson yakakibwa okulekulira ekifo kino mu July w'omwaka guno oluvannyuma lw'ababaka ne baminisita okumukaka alekulire olw'okwetaba ku kabaga mu kiseera ky'omuggalo ye kennyini gwe yateekawo mu kiseera kya Covid-19.
Abalala abavuganya ku Bwakatikkiro kuliko; Rishi Sunak, , Penny Mordaunt, Ben Wallace ne Suella Braverman.