Katikkiro wa Bungereza omuggya akoze obulombolombo ng’ayingira ofiisi

KATIKKIRO wa Bungereza omuggya, Rishi Sunak atuukirizza obulombolombo bw’ Abayindi bwe yeesibye akakomo akamanyiddwa nga kalawa akagambibwa nti kagaba emikisa omuntu n’atafuna bizibu.
Sunak bwe yabadde ayingira ofiisi omulundi ogwasookedde ddala okuva lwe yalondebwa ku bwakatikkiro yazze yeesibye akakomo ku mukono.
Okusinziira ku buwangwa bw’Abahindu, akakomo kano kawa omuntu obuvumu n’amaanyi agamuyamba okuvuunuka okusoomooza kwonna kwasanga.
Bwe yabadde ayingira mu mulyango gwa ofiisi aliko emikolo gy’obuwangwa gye yakoze. Yafukamidde wansi n’abeerako ebintu bye yasudde n’alondawo ebigambibwa nti nabyo birina akakwate ku bulombolombo bw’Abayindi.
Sunak ye Katikkiro wa Bungereza asoose ng’alimu omusaayi Omuyindi. Ku myaka 42 gyalina yafuuse Katikkiro eyaakasinga okulya entebe nga muto mu myaka 200 egiyise.
Mu kwogera kwe, Sunak yatenderezza abadde Katikkiro wa Bungereza, Liz Truss olw’obuweereza obulungi eri eggwanga. Yagambye nti aliko bingi byakoze ku lw’obulungi bw’eggwanga.
Yasuubizza ng’obukulembeze bwe we bugenda okussa essira ku bukulembeze obuweesa ekitiibwa, enkola y’emirimu mu ngeri y’ekikugu n’obuweereza obufa ku bizibu by’abantu.
Oluvannyuma lw’okusisinkana Kabaka Charles II owa Bungereza, Sunak yalayiziddwa nga Katikkiro bwa Bungereza. Yafuuse Katikkiro mu bbanga lya wiiki musanvu. Okulondebwa kwaddiridde Truss okulekulira oluvannyuma lw’ennaku 42 zokka ng’ali mu ofiisi.
Kyokka Sunak yatandikiddewo okusanga akaseera akazibu bwe baamulumbye olw’okulonda Suella Braverman okubeera omuwandiisi we avunaanyizibwa ku nsonga z’amaka ge.
Bamulumiriza okuweereza ebiwandiiko bya ofiisi ng’akozesa omukutu gwe ogwa mail ogw’obuntu. Yvette Cooper ow’ekibiina kya Labour Party yatuuse n’okusaba Braverman anoonyerezebweko oba nga taliiko misango mirala gye yali azzizza kuba abeebyokwerinda tebafulumya lipooti ekwata ku musango guno.
Kyokka Sunak alaga nti akyali mugumu nnyo era tatidde kusoomoozebwa kw’ayolekedde kuba ebizibu ebizze bisuula b’addidde mu bigere azze abiraba era abimanyi.