Abadde agenda okutuula ebya P7 leero bamulongoosezzaamu omwana e Nakifuma

Abasomesa n’abakulira amasomero ga pulayimale ag’enjawulo babukeerezza nkokola okweyiwa ku poiisi e Mukono okukima ebigezo by’akamalirizo eby’ekibiina eky’omusanvu ebitandise olunaku olwaleero.

Okusinziira ku avunaanyizibwa ku by’enjigiriza mu disitulikiti eno, Rashid Kikomeko, anyonyodde nti abayizi 16,435 be batudde ebigezo bino era nga babikoledde mu masomero 256 okuli ago ag’obwa nanyini n’aga gavumenti.

Rashid Kikomeko,akulira Ebyenjigiriza Ku Disitulikiti Ng'annyonnyola.

Kyokka agambye nti ku bayizi bano, omuyizi omu yekka (amannya gasirikiddwa) mu ssomero lya Buseenya Primary School erisangibwa mu Town kkanso ya Nakifuma Naggalama y’asuubirwa obutakola bigezo bino olw’ensonga nti yalongooseddwamu omwana ku mmande.

“We bukeeredde olwaleero nga tetunafuna kuddibwaamu kwonna okuva eri abazadde kubanga babadde baatusuubizza nti bajja kumuleeta akole ebigezo olw’ensonga nti essomero lyo lyakkiriza okumuteerawo embeera yonna enaamusobozesa okubikola obulungi wakati mu mbeera gy’alimu etali nnungi.

Ab'amasomero Bwe Babadde Nga Bakungaanye Okufuna Ebigezo Okuva We Bituukira Ku Poliisi E Mukono.

Okutwaliza awamu tubadde tetunnafuna buzibu bwonna olw’embeera y’obudde ekedde nga nnungi era ebigezo bituuse bulungi ku masomero n’eri ago ag’okubizinga nga e Kkoome, Zzinga, Buvuma n’ebitundu ebirala ebyesudde ekibuga.” Kikomeko bw'agambye.

Nassolo Ng'aliko By'annyonnyola.

Avunaanyzibwa ku byenjigiriza mu munisipaali y’e Mukon,o Faridah Naasolo, ategeezezza nti ku mulundi guno omuwendo ogw’abaana abawala abagenda okutula ebigezo gusinzeeko ku gw’abalenzi olw’akazito ke baatandika okussa ku bazadde okulaba nga bafaayo nnyo okutwala abaana baabwe abawala ku masomero okusingako nga bwe gubadde emabega.

Wano era w'asinzidde n’alabula ab’amasomero okwewalira ddala okulemesa abayizi okukola ebigezo bino olw’ensonga z’ebisale by’amasomero okwewala okuvunaanibwa.