Ababundabunda balabuddwa okwewala ebyobufuzi

Nga tuyingira ssizoni y’okunoonya akalulu aya kaasammeeme, abanoonyi b’obubudamu balabuddwa okwewala okwenyigira mu byobufuzi kubanga amateeka ga Uganda tegabakkiriza.
Bino byayogeddwa Mike Orlando, ssentebe wa Gogonya zzooni e Nsambya mu Kampala. Ekitundu kino, Orlando agamba nti kirimu ababundabunda bangi ng’ate abasinga bavubuka. Bano basobola okukozesebwa bannabyabufuzi okubanoonyeza akalulu, ekimenya amateeka.

Mike Orlando ssentebe wa Gogonya zone in Makindye

Orlando byabyogeredde ku mukolo gw’okujaguza olunaku lw’ababundabunda olwa World Refugee Day nga lukuzibwa buli nga June 20. Baabadde ku kitebe ky’ekitongole kya Young African Refugees for Integral Development (YARID) e Nsambya ku Lwokutaano nga June 20. Omukolo gwetabiddwako ababundabunda abaasobye mu 500 nga bava mu mawanga okuli South Sudan, Sudan, Ethiopia, Eritrea, Congo ne Afghanistan. 
Yagambye nti wiiki ewedde, waliwo ekibinga ky’abavubuka bannayuganda ekyalumbye ababundabunda nga babasaba okubeegattako okunoonyeza omuntu waabwe akalulu kyokka ababundabunda bwe baagaanye, ekibinja ne kyagala okubakuba. Era Orlando ye yabataasizza. 

Abanoonyi b'obubudamu nga bazannya Tayikondo

Ne Robert Hakiza, akulira YARID yakkaatirizza nti; “Abanoonyi b’obubudamu bonna tusiiba tubajjukiza nti kimenya mateeka okwetaba mu byobufuzi bya Uganda. Etteeka lituwa ebbeetu okwetaaya kyokka litugaana ebyobufuzi era temukkiriza kubakozesa kubanga mujja kutuleetera ebizibu.”