Eishomero rya gavumenti erya Mbarara Junior ritungire bus.

Eishomero rya gavumenti erya Mbarara Junior ritungire bus.

N’ebya Abdulkarim Ssengendo

Biishopu w’obureeberezi bwa Ankole, Ass. Prof. Fred Sheldon Mwesigwa akwataniise na RCC wa Mbarara City Lt. Col James Mwesigye batongoizeho emotoka y’eishomero erya Mbarara Junior School. Omukoro ogu guhikirweho abeebembezi abandi n’abashomesa b’eishomero eri.

Omu bigambo bye, Biishopu Sheldon asiimire abeebembezi ba Mbarara Junior School, ahabwa purogyekiti z’entunguuka eziri ah’eishomero eri.

Mukuru w’eishomero eri, Nathan Mugume ashabire abazaire okugamba n’abaana baabo kandi babahabure omu kubooreka omuhanda oguhikire baaba nibabagaruza ah’eishomero.

Emotoka egi eguzirwe esente zirikwingana miriyooni 129 kandi neija kuhweraho omu kutambuza abeegi n’abakozi b’eishomero baaba nibaza kukora emirimo y’eishomero. 

Mugume agizire ngu emotoka egi niyo y’okubanza kuruga eishomero eri ritandikwaho omu myaka 112 ehingwire.

John Agaba, ceeyamaani wa boodi ahabw’eishomero eri ashabire abazaire okugaruza abaana baabo ah’eishomero bukiri kare kwenda ngu batafeerwa okushoma.

RCC wa Mbarara, Lt. Col. James Mwesigye arabwire bakuru b’amashomero abarikuryangatanisa esente z’amashomero.

#WestUpdates