Omukazi akwatsirwe ahabw’okugaburira omwana ou ari muk’ishe empitirizo 46 omuri Mitooma.

N’ebya Bruno Mugizi

MITOOMA

Pooriisi omu disiturikiti eya Mitooma ekwatsire omukazi w’emyaka 45 omanyirwe nka Juliet Tushabomwe ow’omu kyaro kya Rweibaare omu tauni kanso ya Kashenshero ahabw’okugambwa kuba yagyemire omutabani ou ari muk’ishe ow’emyaka 9 okumira empitirizo 46.

Omwana ogu omanyirwe nka Samuel Akamumpa nagira ngu atwire naganya arikugira ngu nashaasha omunda kumara wiiki 2 ekigyemeseriize ish’enkazi, Birungi Eunice okumutwara kumuraguriza.

Akamumpa ahairwe ekitanda ah'eirwariro erihango erya Mbarara bwanyima ya x-ray na scan kworeka ngu hariho ekyoma ekiri omu kifuba ky’omwana ogu. 

Akamumpa ku bamushemiize bamwihiremu empitirizo 46 ezi muk’ishe arikugambwa kuba abaire yahisya arikumumurisa.

Samuel Akamumpa,9, ou bashemiize bakihamu empitirizo 46 ezi muk'ishe arikugambwa kuba abaire yahisya arikumumurisa.

Nikigambwa ngu Juliet Tushabomwe, muk’ishe w’omwana ogu abaire nasinga emptirizo ezi omu rupapura reero agyema omwana ogu okuzimira kandi abaire namuheereza obushera kwenda ngu zimwanguhire omukuzimira.

Ishe w’omwana Simon Twinomugisha agambire Pooriisi ngu embeera eizire kutabuka omuka bwanyima y’omwana ogu okugambira nyina kimuzaara.

Omuduumizi wa Pooriisi ahabw’ekyanga ekya Bushenyi empango, Godfrey Achiria nagira ngu Juliet Tushabomwe akwatsirwe kandi naija kuteebwaho omushango gw’okuteeraho okwita.

#WestUpdates