Eminyeto omuri etendekirwe omukoresa kanyabwengye okuguza ebihingwa byabo.

N’ebya Thomas Tumwebaze

KIKUUBE

Eminyeto omu disiturikiti eya Kikuube etendekirwe aha miringo ei barikubaasa kukoresa okuguza n’okushuubura ebintu byabo barikwejunisa za kanyabwengye.

Nk’omuringo gumwe ogw’okwetebekanisiza entunguuka eziriyo nizikorwa omu kyanga kya Bunyoro, ekitongore ekya United Nations Capital Development Fund hamwe n’ekya Mastercard Foundation batendekire eminyeto eri ahagati y’emyaka 18-35 aha kubarikubaasa kukoresamu kanyabwengye okuguza n’okushuubura ebintu byabo batabandize kuteganisibwa.

Eminyeto egi etendekirwe aha bintu nk’okuhinga okw’omurembe, obutare bw’emibazi y’ebihingwa etari y’ebicupuri, okukoresa esimu okuronda obutare hamwe n’ebindi.

Boniface Byaruhanga, mukuru w’ekigombe kya NRM ahabwa tauni kanso ya Kikuube nagira ngu eki bakikozire okwenda kurinda ebikozirwe (Protecting the gains) n’okuhwera eminyeto kureeba ngu yaganyirwa omu bwebembezi bwa gavumenti ya NRM na Purezidenti.

Eminyeto egi etendekirwe aha bintu nk’okuhinga okw’omurembe, obutare bw’emibazi y’ebihingwa etari y’ebicupuri, okukoresa esimu okuronda obutare hamwe n’ebindi.

Byaruhanga nayongyeraho ngu nibateekateeka kwija kureeba empinduka omu by’obushuubuzi, obuhingi n’oburiisa n’entunguuka.

Ismael Tabu, orikukora na EZY AGRIC nagira ngu Mastercard Foundation hamwe na United Nations Capital Development Fund batiiremu esente nyingi okwenda kwegyesa eminyeto nk’oku bashemereire okukoresa kanyabwengye okukora bizinesi batabandize okutambura.

Abatendekirwe nibagira ngu omushomo ogu niguza kuhindura emiringo ei babeire nibakoramu emirimu yaabo hamwe na bizinesi zaabo barikworeka ngu beehireyo okukoresa kanyabwengye bakabaasa kwetunguura.

Omu batendekirwe harimu 70% y’abaishiki, 3% y’empungi, aboojo ni 20% reero abaine oburema ahamibiri yaabo ni 7%.

Omushomo ogu gwetabirwemu eminyeto y’omu disiturikiti eya Kikuube hamwe n’eminyeto y’empungi erikutuura omu kampu eya Kyangwali.

#WestUpdates