Ntare, Chaapa na Boni Consilii zayongyera kworeka omutindo omu Ball Games

Tiimu ya Boni Consilii yayongyera kukora kurungi omu mpaka z’emizaano y’amashomero ga siniya eza Uganda yoona ezirikuhindira omuri Mukono, bwanyima y’okusinga eya Jinja Comprehensive 1-0 omururengo orwa tiimu 16, etyo ekarabaho okuza omururengo rwa tiimu 8.

Joan Kiiza niwe yaateeba goora egi omudakiika y’okubanza nikwo Boni Consilii kurabaho okuza omu ‘quarterfinals’ ahi erikuza kubugana eya Jinja Progressive Acedemy eyasinga Kanshenshero 4-0

Omu ‘quarter finals’, Boni Consilii yayegeitwaho eya St Noa abaine ekikopo eki kandi hoona abaasinga Moyo Stars 5-0, Latifa Mixed eyaasinga Uganda Martrys 6-5 omu kusimurana za penati, Rines eyasiinga Nkoma 2-0, Kawempe Moslem abaasinga St Charles Lwanga Kasasa 4-0 na  Bukedea Comprehensive School eyaasinga Standard High Zzana 4-3 omu kusimurana za penati bwanyima ya 1-1 

PHOTO: ALOYSIUS BYAMUKAMA

Omu rugby, Mbarara High na Ntare School zaarabaho okuza omu ‘quarterfinals’ nyenkyakare ahi Ntare School erikuza kuriitana n’abatebeekanisa aba Namilyango College kandi Mbarara High neija kuriitana na St Mary’s College Kisubi.

Omu volleyball, Sheema High School yaasingirwa omu ‘quarterfinals’ ahi yaasingwa eya Tororo Girls 3-1 kandi omu netball, Nyamitanga hamwe na Mbarara Army zaarugamu. Omu handball, Immaculate Heart yaasinga Kyamate 5-3 okuhisya emizaano eshatu etarikusingwamu.

Emizaano egi neija Kuhendendera aharwakana wiiki egi