Obujjanjabi obusookerwako ng’omuntu agudde ekigwo

Okusinzittuka n’ogwa wansi, kintu ekisobola okutuuka ku buli muntu essaawa yonna. Osobola okugwa ng’odduka, oba nga waliwo ekintu ekikuteze, okuseerera ku seminti oba mu bisooto mu budde obw’akaseerezi.

Oyinza okufuna obuvune obutonotono oba obw’amaanyi ennyo, okusinziira ku ngeri gy’oba oguddemu, n’ekifo w’ogudde.

Omukutu gwa https://firstaidforlife.org.uk kugamba  nti erimu ku ddagala lye tumira, nalyo liyinza okukuleetera kamunguluze ne weekanga nga werindiggudde ennume y’ekigwo.

• Omuntu bw’agwa wansi ng’omuli kumpi tosooka kupapa. Weetegereze olabe oba omuntu akyassa, oba takyassa. Bw’aba assa, muwembejje bulungi nga bw’onoonya olabe oba aliko obuvune bw’afunye.
• Bw’aba tassa, yanguwa mangu okuzuukusa omutima gwe ng’okozesa enkola ya CPR (cardiopulmonary resuscitation).
• Mu nkola eno, onyiga ku kifuba ky’omulwadde n’ekibatu kyo kyonna emirundi nga 30, bw’omala n’omufuuwa omukka mu kamwa, kimuyambe okutandika okussa, aleme kuyitirayo.
• Noonya olabe oba waliwo awava omusaayi, oguziyize okufuluma, ng’osibawo akagoye akatukula oba bandegi.
• Bw’aba alina awazimbye, teeka bbalaafu mu kagoye omuteeke awazimbye, kimuyambe okukkakkana ku bulumi, n’okukendeeza ku kuzimba.
• Londoola omuntu oyo okumala essaawa 24, bw’ozuula ng’alumizibwa olw’obuvune, mutwale mu ddwaaliro ajjanjabibwe.