Enjura yaateganisa okuteera oburuuru omururembo Mbarara

N’ebya Abdulkarim Ssengendo

Okuteera akaruuru omumyanya 305 y’okuteereramu akaruuru kwatandika gye beitu bwanyima kwaija kwateganisibwamu enjura eyaareetera okukyererwa kuteera oburuuru omumyanya etari emwe n’emwe.

Abarikukurira okuteeza oburuuru beete aba Electoral Commission baayejunisa obwoma oburikushwijuma abateezi b’akaruuru kandi okurugiirira ahari orikwebembera akakiiko aka, obwoma obu bwakora gye omumyanya yoona kandi enshonga nkye ezaaba omumyanya emwe zaatereezibwa ab’akakiiko abaaba bariyo.

Abateezi b’akaruuru omururembo oru bariyo nibateerera abantu 9 abarikwenda entebe za ba meeya na ba Kansara baabo omuri za diviijoni 2; Mbarara City ey’amashuuma na Mbarara City ey’amatemba.

 Mbarara City ey’amatemba eyine emyanya 124 erikuteererwaho akaruuru kandi abantu abarikuteera akaruuru nibaingana 54,032 kandi omumashuuma harimu emyanya 181 erikuteererwaho akaruuru kandi okwo hariyo bateezi b’akaruuru barikuhika 81,724.

Abantu 4  nibo beesimbire omuri Mbarara City ey’amatemba kandi 5 nibo beesimbire omuri Mbarara City ey’amashuuma.

Bwanyima y’okubuuzibwa ahamubaro gw’abantu abaija ahamyanya egi kuteera akaruuru, orikukurira eby’okuteera akaruuru omururembo orwa Mbarara, Violet Atuhurra, yaagira ngu ahabw’okukoresa obwoma oburikushwijuma abateezi b’akaruuru, omubaro gw’abantu abaija kuteera akaruuru gwayeyongyera wagyera-gyeranisa n’oburuuru obuhweire.

Atuhurra yaayongyera yaagira ngu obwoma bwakora gye omumyanya yoona kandi yaahiga abateezi b’akaruuru kuguma baine obuteeka obwo bategyereize ebiraarugye omukubara oburuuru.

#WestUpdates 
#UgandaDecides2026