Ebyoma by’okuteeza oburuuru byayemerezibwa

N’ebya Charles Etukuri na Mary Karugaba

Akakiiko k’eby’oburuuru, Electoral Commission, kaayihaho okukoresa ebyoma ebirikushwijuma abateezi b’akaruuru ahamyanya erikuteererwamu akaruuru bwanyima yaabyo kuremwa kukora.

Kamiishana w’akakiiko k’eby’oburuuru, Stephen Tashobya, obwo arikugambaho na TV West, yaagira ngu omumyanya ahi byarema kukora baabyihaho kandi abarikukora emirimo y’okuteeza oburuuru omumyanya egyo baashabwa kukoresa omuringo ogw’okusherurira omubitabo by’amaziina g’abateezi b’oburuuru.

“Twacwamu kwihaho ebyoma ebi kubaasisa enkumi n’enkumi z’abanya Uganda kuteera akaruuru. Abarikuteeza oburuuru nibabaasa kukoresa ekitabo,” Tashobya nikwo yaagira.

N’obu Tashobya yaagambaho na TV West ahari shaaha nk’ishatu z’akasheeshe, ahi bwaza kuhikira shaaha 4 n’ekicweka, emyanya emingi yaaba etakakimanyire kandi abateezi b’akaruuru abaaba bariho baaba batarikumanya ekuy’okukora kandi bamwe baacwamu kureka kuteera akaruuru.

Beitu ahi baamanyisibwa, okuteera akaruuru okwa buriijo kwagyenda omumaisho.

Aharwakabiri, mukuru w’akakiiko k’eby’oburuuru omu ihanga, Justice Simon Mugenyi Byabakama, obwo arikugamba n’abanyamakuru aha ofiisi z’eby’oburuuru omuri Kampala, akagira ngu baine omuringo ogundi ebyoma ku byakurema kukora.

“Nitwohereza ebyoma biriri ahari buri mwanya gw’okuteereramu akaruuru kandi kimwe nikiija kuba kiri eky’okukoresa eky’okubanza ku kyakwanga. Kwonka eky’omugasho munonga n’okugira ngu tihariho muteezi w’akaruuru oraateganisibwe. Buri muteezi w’akaruuru naija kuheebwa omugisha gw’okuteera akaruuru kye.”

#WestUpdates
#UgandaDecides2026