Akaruuru ka ba ceeyamaani LC1 kuteerwa omwaka ogu- Dr Baryomunsi.
Akaruuru aka kakaba kari ak’okuteerwa omwaka oguhwaire ogwa 2025 beitu kakongyezibwayo n’enteekateeka y’okwenda ngu kateerwe n’oburuuru bwa boona obuteirwe omwaka ogu ogwa 2026.
Minisita w'eby'amakuru, Dr Chris Baryomunsi nashaba ebigombe by'obutegyeki hamwe naabo abarikwenda kwesimba ahabwa LC1 okutandika kwetebeekanisa.
N’ebya Beth Akatukunda
KAMPALA
Gavumenti erangiriire enteekateeka z’okuteeza akaruuru ka bakuru b’entebe z’ebyaro omwaka ogu ogwa 2026 bwanyima y’okuhenderagye oburuuru bw’okutoorana Purezidenti, abany'eishengyero n’abeebembezi ba gavumenti z’ebyanga.
Uganda ehereruka kuteera akaruuru ka bakuru b’entebe z’ebyaro omu mwaka gwa 2018.
Akaruuru aka kakaba kari ak’okuteerwa omwaka oguhwaire ogwa 2025 beitu kakongyezibwayo n’enteekateeka y’okwenda ngu kateerwe n’oburuuru bwa boona obuteirwe omwaka ogu ogwa 2026.
Arikugambaho n’abanyamakuru ahari Uganda Media Center omuri Kampala Orwakashatu ebiro 11.02.2026, Minisita w’eby’amakuru n’okuhabura eihanga, Dr Chris Baryomunsi akyorekire ngu akakiiko k'eby'oburuuru aka electoral commission nikeija kushohoza engyenderwaho y'oku akaruuru aka karateerwemu.
Dr Baryomunsi ayongiire yakyoreka ngu n'obu akaruuru aka kizire nikongyezibwayo beitu bakuru b’entebe z’ebyaro nibakora omwoga muhango kandi akaruuru aka nikeija kuteerwa aha muheru gw'omwaka gwa 2026.
Minisita nashaba ebigombe by'obutegyeki hamwe naabo abarikwenda kwesimba okutandika kwetebeekanisa.
#WestUpdates