Electoral Commission yaayongyeza eshaaha z’okuteera akaruuru
Enganzi y'eihanga, Rt Hon. Robinah Nabbanja, ari omurunyerere kuteera akaruuru ka boona eriizooba ahakishaayi kya Kakeeka omuri Kakumiro. PHOTO: VPPU
N’ebya Charles Etukuri na Mary Karugaba
Akakiiko akarikutebeekanisa eby’oburuuru kaayongyeza eshaaha z’okuteereramu oburuuru kuruga ahari shaaha 10 z’omwabazyo kuhisya shaaha 11 z’omwabazyo okurugiirira ahakukyererewa okwabaho omukasheeshe bwanyima y’ebyoma ebirikushwijuma abateezi ba’akaruuru.
Omugambirizi w’akakiiko k’eby’oburuuru, Julius Mucunguzi yaahamya okwongyeza kw’eshaaha oku kandi yaagira ngu abateezi b’akaruuru baayongyerwa eshaaha 1 kugira weena owaaba ari omurunyiriri yaaba aine kugumizamu akateera akaruuru kye.
Omu ihanga ryona, abateezi b’akaruuru baayoreka okuguubwa kubi bwanyima y’ebyoma ebirikushwijuma abateezi b’oburuuru kuremwa kukora nikwo kureetaho obuhinzya-mutima omubicweka bitari bimwe na bimwe eby’okuteererwamu akaruuru.
Arikugaaniiraho na TV West, orikukurira akakiiko k’eby’oburuuru, Justice Simon Byabakama yaagira ngu ahi byoma byaremwa kukora, ebitabo ebirimu amaziina g’abateezi b’akaruuru bikoresibwe kwetantara okukyererewa n’okuribatiirira obugabe bw’abantu.
Byabakama yayongyera yaagira ngu n’obu haraabe haazamu obuzibu bw’ebyoma ebi, ekitabo ky’eihanga ekirimu amaziina g’abateezi b’akaruuru nikyo kiine omugasho gw’amaani kurinda emirinda emirimo yoona ey’okuteera akaruuru.
Eriizooba orwakana ebiro 15.01.2026, abateezi b’akaruuru omu ihanga ryona baaza kuteera akaruuru ka mukuru w’eihanga hamwe n’abajwekyerwa b’eishengyero. Abantu 8 nibo barikwenda obwa Purezidenti kandi 7 omuri aba nibenda kuhirika oriho, Purezidenti Yoweri Kaguta Museveni owa NRM.
Mushanju aba ni Robert Kyagulanyi owa National Unity Platform, Robert Kasibante owa National Peasants Party, Joseph Mabirizi owa Conservative Party na Nathan Nandala Mafabi owa Forum for Democratic Change.
Abandi ni Gregory Mugisha Muntu, owa Alliance for National Transformation, Mubarak Munyagwa owa Common Man’s Party na Frank Bulira Kabinga owa Revolutionary People’s Party.
Okurugiirira ahakakiiko k’eby’oburuuru, eihanga rikahandiika abateezi b’akaruuru barikwingana
21,681,491 n’emuyanya erikuhika 50,739 ey’okuteereramu akaruuru omu disiturikiti 146 ahi bwagiire kuhikira okwa ikumi n’abiri 2025. Hariho amashaza 312, emyanya erikuhika 353 erikujwekyerwa omu ishengyero, amagomborora, amatauni na za munisiparity birikuhika 2,191, emiruka 10,717 n’ebyaro 71,214.
#WestUpdates
#UgandaDecides2026