Akakiiko k’eby'oburuuru kaarangirira Minisita Rwamirama nk'otaine kihakanisa - Isingiro

N'ebya Abdulkarim Ssengendo

Akakiiko akarikukurira eby'oburuuru omu ihanga kaarangirira minisita w’eby’obuhingi, amatungo n'obujubi Lt Col Dr. Bright Rwamirama nk'orabireho ataine kihakanisa omu karuuru k’omuny'ishengyero wa Isingiro North.

Ogu yarangirirwa eriizooba aha kitebe ekikuru ky’eby'oburuuru ekya disiturikiti y'Isingiro.

Julius Arineitwe orikurira eby'oburuuru ahabwa disiturikiti ya Isingiro niwe yarangirira Minisita Bright Rwamirama omu ofiisi erikushangwa omuri Isingiro Town Council.

Arineitwe yashoborora ebi akakiiko kagyendeireho kurangirira Rwamirama ebirimu bamwe aha babaire betsimbire na Rwamirama kumwimukira, abandi babuzirwe empapura z’eby'obwegyese kandi abandi tibarahikiirize ebi akakiiko k’eby'oburuuru kaabeire nikeetaaga kwesimbaho.

Rwamirama abaire ayesimbirweho abantu 6 abarimu Twebaze Keneth, Bategyeza Baker Kasiisi, Atwine James, ababeire bataine bibiina, Ntanda Shaliff Binhakim owa NUP, Ankunda Best Arnold owa PFF hamwe na Anthony Rutahwire owa ANT.

Bwanyima y’okurangirirwa, Minisita Rwamirama yaayoreka amashemererwa kureeba ngu baamuhamya kuba MP wa Isingiro North ataine kihakanisa nikwo kusiima abo boona abamurekuriire kandi yaraganisa kugumizamu naahagira entunguuka omuri Isingiro.

Rwamirama hoona yayehanangiriza abantu ba Isingiro okuteerera President Yoweri Museveni akaruuru hamwe n'abo boona abakwateire NRM ebendera. 

#UgandaDecides2026 
#WestUpdates