Uganda ewezezza emidaali 12 mu mizannyo gya Islamic Solidarity Games e Saudi Arabia

Uganda etaamye, yaakakungaanya emidaali 12 mu mizannyo gya Islamic Solidarity Games e Saudi Arabia
Nga esigadde mbale emizannyo gya Islamic Solidarity Games okukomekkerezebwa mu kibuga Riyadh ekya Saudi Arabia, Uganda eyongedde okukumba emidaali mu mpaka ezo.
Mu kiro ekikeesezza olwalero Uganda ewezezza emidaali 12 gyeyaakakunganya mu mpaka ezo oluvannyuma lwabaddusi Halima Nakaayi (800m), Charity Cherop (5000m) ne Leni Shida (200m) okukola obulungi mu misinde.
 Nakaayi yamalidde mu kifo kyakubiri mu mbiro eza mmita 800 nawangula omudaali ogwa Feeza . Cherop naye yawangudde Feeza mu mbiro eza mmita 5000 ate ye Leni nawangula omudaali ogwekikomo oluvannyuma lwokumalira mu kifo ekyokusatu mu mpaka ezakafubutuko eza mmita 200.
Gino emidaali gyegasse ku gya Samuel Simba (Feeza) ne Abel Chebet (Kikomo) mu mbiro eza mmita 10,000 egyawanguddwa olunaku lweggulo.

Bannayuganda nga bakutte emidaali

Mu misinde Rebecca Chelangat yeyasobodde okutunwangulira omudaali ogwa zaabu mu mbiro eza mmita 10,000 mu basajja ate nga ye omuwuzi Anna Gloria Muzito awangulira mu ggwanga lya Hungary yatuwangulidde emidaali ebiri mu mmita 50 ne 100 mu freestyle. 
Muzito era yawangulidde Uganda omudaali omulala ogwa Feeza mu mmita 200 eza freestyle.
Emidaali emirala gyawanguddwa Alfred Ojok (bikonde), Parvin Judith Nangonzi ne Jemimah Nakawala (Table Tennis doubles) mu bakazi n’omuwuzi Jesse Ssuubi Ssengonzi.
Uganda ekyalina essuubi lyemidaali emirala mu baddusi okuli Halima Nakaayi ne Knigh Aciru (1500m), Tom Dradriga (200m), mixed relays ne Simba ne Leonard Chemutai abagenda okuttunka mu za mmita 5000