Omuliro gukutte ekisulo kya Half London Primary School e Kitintale

OMULIRO  ogutannaba kumanyika kweguvudde gukutte ekisulo ky’abayizi ku ssomero lya Half London Primary School e Kitintale mu zooni 12 ebintu bya bukadde ne bisaanawo.

Kigambibwa nti omuliro guno gwatandise ku makya ga Mande ku saawa nga 3 nga abayizi bali mu bibiina byabwe nga n’abamu abasangiddwa mu bisulo basobodde okutaasibwa mu bwangu nga tebannafuna nnyo bisago.

Abayizi nga bali mu bisiriiza by'omuliro ogukutte ekisulo

Abamu ku batuuze omuliro guno bateebereza nti gwandiba nga guvudde ku masannyalaze kubanga gabadde gatera okubasumbuwa mu kitundu kino.

Ssentebe w’ekitundu kino Godfrey Ndawula ategeezezza nga bwekyennyamiza okulaba nga essomero mu kitundu kye likutte omuliro n’asaba abantu okongera okukola ku nsonga zonna eziyinza okuvaako omuliro.

Atwala eby’okwerinda  mu Mutungo Isa Tabalo Kavuma ategeezezza nga bwebamukubidde essimu nga bamutegeeza nga essomero bwe likutte omuliro naye kwekusitukiramu n’abakakiiko okijja bataakirize embeera.

Oluvannyuma Poliisi ezikiriza omuliro nga eri wamu n’eye Kitintale nga ekulembeddwamu agiduumira Moses Kyeyamwa etuuse mu kifo kino n’emmotoka ezizikiriza omuliro kyokka basanze akaseera akazibu olw’okubulwa ekkubo weziyita.

Kyeyamwa asabye abantu bulijjo okulekangawo amakubo agayinza okuyitibwamu obuyambi singa obuzibu bubeera buzze