Amawulire
Kooti ekakasizza Nakweede ne Baseke ab'e Kayunga ku bubaka bwa Palamenti
Kooti egaanyi okuddamu okubala obululu ku bifo eky'omubaka omukyala owa disitulikiti y'e Kayunga n'ekyomubaka owa Ntenjeru South nga abaawangulwa ku bifo ebyo bwe baali bagisabye.
Nakwedde wano abadde mu kkooti ng'asaba essaala ey'obuwanguzi
By: Saul Wokulira, Journalists @New Vision
Kooti egaanyi okuddamu okubala obululu ku bifo eky'omubaka omukyala owa disitulikiti y'e Kayunga n'ekyomubaka owa Ntenjeru South nga abaawangulwa ku bifo ebyo bwe baali bagisabye.
Akulira abalamuzi ba kooti ento e Kayunga omulamuzi John Francis Kaggwa agobye emisango gy'abawaabi era n'akakasa omuwanguzi bwa Harriet Nakweede ku kifo ky'omubaka omukyala wamu n'obwa Fred Baseke owa Ntenjeru South.
Jackline Birungi Kobusingye owa NRM yafuna obululu 37,246 yaddukidde mu kooti nga agamba Nakweede owa NUP eyafunye 38,547 teyamuwangudde mu bwenkanya kubanga waliwo ebifo 10 ebitaabalibwa.
Obwedda omulamuzi asoma ensala y'omusango nga Nakweede yewombeese ali mu ssaala era oluvanyuma lw'omulamuzi okukatyemula nti omusango agugobye wabaddewo okujaganya ku kooti ne Nakweede ne puliida be. Ye Birungi ku kooti talabiseeko ku kooti wadde Bannamateeka be.
Nakwedde ng'ali mu kkooti e Kayunga
Omulamuzi Kaggwa emisango agigobye nti abawaabi tebaaleese mpapula zikakasa nti obululu bwabwe tebwagattibwa bulungi era alagidde akakiiko k'ebyokulonda kagende mu maaso n'okukuba Nakweede ne Baseke mu kyapa kya gavt ekitongole.
Twogeddeko ne Nakweede nga ajjudde essanyu neyebaza Katonda olw'eddaala ly'amutuusizzaako era ne yebaza ekitongole ekiramuzi olw'okisala amazima.
Ate Bannamateeka okuli Andrew Wabwezi ne Mudyobole Abedi Nasser bagambye nti empapula abawabi ze baaleese mu kooti tezaakakasiddwa kakiiko ka byakulonda kubanga tekwabadde sitaapu era ne basanyukira eky'omulamuzi okugoba omusango guno.
Ate ye Fred Baseke nga avulubanye essanyu olwa kooti okumukakasa agambye nti Nsanja abadde ayagala kuddayo mu palamenti nga ayita mu ddirisa ne yebaza kooti olw'okusala amazima.