Museveni ataddeyo okwewozaako mu musango gw'obululu

BALOOYA ba NRM bataddeyo okwewozaako kwa Yoweri Kaguta Museveni mu musango ogwamuwawaabiddwa n’akakiiko k’ebyokulonda ku byavudde mu kulonda kwa January 15, 2026.

Omusango gwawaabiddwa Robert Kasibante owa National Peasant Party (NPP) ng’awakanya obuwanguzi bwa Museveni era ayagala kkooti ebusazeemu.

Bannamateeka Ba Pulezidenti Museveni Nga Bateekayo Okwewozaako Kwabwe

Balooya ba Museveni ne NRM okwabadde Usaama Ssebuwufu ne Anthony Bazira, baatutte okwewozaako mu kkooti ey’oku ntikko nga basaba omusango gugobwe kubanga teguliimu ggumba.

Mu biwandiiko bya balooya be, Museveni yasambazze okwemulugunya kwa Kasibante nti okulonda kuno tekwagoberera mateeka bw’atyo n’agamba nti okulonda kuno kwagoberera Ssemateeka wa Uganda, amateeka g’ebyokulonda n’agafuga okulonda kw’Obwapulezidenti era ebyakuvaamu tewali we byakoseza kulonda kuno.

N’agamba nti, Kasibante alina okuleeta obujulizi obukakasa by’ayogera, n’asaba omusango guno gugobebwe kubanga yalondebwa mu butuufu.

Yasambazze eby’okubeera nga waaliwo vvulugu eyalabikira mu kulonda kuno oba omuntu yenna okukolera ku biragiro bye nga Kasibante bw’agamba mu mpaaba ye. Museveni agamba nti okulonda kuno kwali kwa mirembe era yalondebwa mu butuufu.

Yeegaanyi eby’okuyingirira emirimu gy’akakiiko k’ebyokulonda nga Kasibante bw’akimussaako omuli okuwanduukulula abalonzi mu nkalala z’abalonzi n’okusazaamu abantu abaali basunsuddwa ku bifo ebimu naddala abali ku ludda oluvuganya.

Museveni agamba nti, ensonga ezo teziriimu nsa era si nnambulukufu.

YEEGAANYI OKWEYAMBISA ABEEBYOKWERINDA
Yeegaanyi eby’okukozesa ebitongole by’okwerinda okutulugunya abeesimbyewo ku ludda oluvuganya Gavumenti nga Kasibante bw’agamba mu musango guno.

N’agamba nti, poliisi ye yali evunaanyizibwa ku kukuuma emirembe mu kalulu ng’eyambibwako UPDF n’ebitongole by’ebyokwerinda era yenga Museveni, tewali we yaweeranga biragiro.

Pulezidenti era awakanya eky’akakiiko k’ebyokulonda okukozesa obubi obuuma obwaleetebwa okweyambisa mu kulonda. Agamba, akakiiko kaawaayo enkalala z’abalonzi eri abeesimbyewo nga kagoberera amateeka, n’asaba Kasibante okukakasa kkooti ku nsonga eno.

Mu kwewozaako, Museveni agamba nti, okugaana okuwandiisa abantu abamu abaali baagala okwesimbawo ku Bwapulezidenti kkooti eno terina buyinza kugiwulira ssinga bagoberera emisango gy’ebyokulonda naddala egikwata kukulondebwa kwa Pulezidenti.

YEEGAANYI OKUGABA ENGUZI
Museveni yeeganyi eby’okugaba enguzi eri abalonzi naddala ssente obuwumbi 3 bw’ayogerwako bwe baawa ekibinja ekimu ekya bamakanika, n’agamba nti ensonga eyo teyagimanyaako.

Ku nsonga ezo n’endala Kasibante ze yateeka mu musango gwe, Museveni yazeegaanyi mu kwewozaako kwe n’asaba omusango guno gugobwe kubanga yalondebwa mu butuufu nga bagoberera Ssemateeka wa Uganda.

Akulira ofiisi ya NRM, Hajati Hadijah Namyalo yategeezezza nga bwe balina obujulizi obulaga nti Museveni yalondebwa mu butuufu era beetegefu okubuwa bannamateeka ba Museveni.