Eyawangudde obwassentebe e Luweero awera kubanja Museveni bye yasuubiza Bannaluweero!

SSENTEBE wa disitulikiti y’e Luweero, Erasto Kibirango alaze by’agenda okussaako essira oluvannyuma lw’okuddamu okulondebwa.

Kibirango yategeezezza Bukedde nti wadde wa NUP, agenda kubanja Gavumenti ne Pulezidenti Museveni bye bazze basuubizza Bannaluweero nga tebabituukiriza.

“Njagala okulaba nga gavumenti eyanguya okumaliriza ekitebe kya disitulikiti eno n’okumaliriza okugaziya eddwaaliro ly’e Luweero”, Kibirango bwe yategeezezza.

N’agamba nti, ayagala eddwaaliro lino gavumenti eriteekemu ebikozesebwa okuli eddaggala n’abasawo abakugu. N’agamba nti, beetaaga n’ekyuma ekikamula omubisi okuva mu bibala okuli emiyembe n’ennaanansi ebirimibwa mu kitundu kino, kitumbule ebyenfuna by’abantu.

Bannaluweero baludde nga babanja ebitundu byabwe okuli Bombo ne Luweero okufuulibwa munisipaali. Kibirango yagambye nti ku mulembe gwa Amin, Bombo yali ku ddaala lya munisipaali kyokka NRM bwe yajja mu buyinza, n’essibwa eddaala.

Ku nsonga y’enguudo, yagambye nti agenda kufuba okulaba nga disitulikiti efuna yuniti erimu ebyuma ebirima enguudo mu kitundu kino nga bwekiri mu disitulikiti endala.

“Ekitundu kyaffe kirimi n’obulunzi. Njagala okulaba ng’ebyokwerinda binywezebwa, obubbi bw’ebisolo bukendeere. Kino kijja kuwa abantu baffe omwagaanya okulima nga tebeeraliikirira nti bagenda kubbibwa,” Kibirango bwe yeeyamye.

Asuubizza okukyusa embeera z’abavubuka ng’ayita mu misomo egibayigiriza okukola ate n’okubakwatirako mw’ebyo bye batandiseewo.

Kibirango yawangudde ekisanja ekyokubiri n’obululu 35,743 nga yamezze Rashidah Birungi eyafunye obululu 28,288.

Yeebazizza abalonzi b’e Luweero olw’okuddamu ne bamwesiga ssaako ne bakulembeze banne ku mitendera emirala.