Omuliro gusaanyizzaawo bya bukadde e Kamwokya

EBINTU ebibalirirwa mu bukadde bw'ensimbi , bitokomokedde mu muliro ogukutte garagi, amaduuka, ebifo omuliirwa emmere  n'amayumba mu Kampala.

Omuliro, gubadde mu zzooni ya Kisenyi 2 mu muluka gw'e Kamwokya mu Kampala Central , bwe gwokezza ebintu omubadde n'edduuka lya pikipiki, amaduuka g'amasimu nga waliwo n'omukyala agambibwa okuba ow’olubuto alumiziddwa.

Omukyala alumiziddwa, ategeerekese nga Jackie Namutebi era nga kitegeezeddwa nti atwaliddwa mu ddwaaliro okufuna obujjanjabi nti kyokka oluvannyuma n'asiibulwa.

Kigambibwa nti omuliro, gwandiba nga gwavudde ku bafumbo ababiri abafunyeemu obutakkaanya nti , omusubbaawa gwe baabadde bakoleezezza ekiro ne gukwata ebintu.

Ensonda mu poliisi, zitegeezezza nti abazinyamwoto, basobodde okuguzikiza omuliro guno, ogubadde ku mizigo 12.