City Oilers yeeswanta kutandika na maanyi mu za Zone 5

2022 Zonal 5 BAL qualifiers;

City Oilers - Matero Magic (Zambia - October 28, 2022)

Urunani (Burundi) - City Oilers (October 29, 2022)

City Oilers - Army Basketball Club (Tanzania - October 30, 2022)

CITY Oilers bakyampiyoni ba liigi y’eggwanga eya basketball emirundi 8 egy’omuddiring’anwa balumbye ekibuga Dar es Salaam ekya Tanzania mu z’okusunsulamu ttiimu ezineetaba Champions League wa Afrika okuva mu Zone 5 (amawanga g'obuvanjuba).

Ekibinja ky’abazannyi 9 n’abakungu 5 be baasitudde okugenda mu Tanzania wabula Mandy Juruni atendeka City Oilers yayongeddemu, Petty Tray Martel ne Roebuck Junior Germine abazannyira mu Amerika okwongera amaanyi mu ttiimu.

Ku ttiimu eyawangudde ekikopo kya liigi y’eggwanga gye buvuddeko, abazannyi nga kapiteeni Jimmy Enabu, John Dombo, Davis Siagi Emmanuel Okumu basigadde lwa buvune kw’ossa Lauk Ruai eyagenze ku pulo e Russia.

Juruni atendeka City Oilers ng'awa abazannyi ebiragiro.

Mu mpaka zino City Oilers eri mu kibinja C omuli; Matero Magic eya Zambia, Army Basketball Club eya Tanzania, Urunani BBC (Burundi) ne Hawassa City eya Ethiopia. Ebibinja biri 4 nga ttiimu ebbiri ezikulembera buli kibinja zaakweyongerayo ku mutendera gwa ttiimu 16.

Ku zino 16 kujja kuyitako ttiimu 6 okwegatta ku bakyampiyoni ba Angola, Misiri, Nigeria, Rwanda, Senegal ne Tunisia ezaayitawo edda okwetaba mu za 2023 BAL.

EKIBINJA EKYASITUDDE

Abazannyi; Drileba Tonny, Komakech Ben, Muhwezi Ivan, Okello James, Kizito Julius Caeser, Azolibe Francis, Petty Tray Martel, Roebuck Jr Germine, Mer Maker Moses

Abakungu; Mandy Juruni Lutwama, Ram Nyakana, Louis Nkwasibwe Obedi, Jackie Omurungi Mary ne Mohammed Ghedi Santur.