Palamenti ya Uganda tewena

PALAMEMTI ya Uganda yalaze nti nsajja mu mizannyo bwe yasitukidde mu kikopo ky’emizannyo gya Palamenti z'amawanga g'obuvanjuba bwa Afrika (East Africa Inter-Parliamentary Games) egyayindidde mu kibuga Kigali ekya Rwanda.

Uganda, yawangudde ebikopo 7 ekyagitadde ku ntikko y’emizannyo gino nga mu mupiira, ekikopo yakitutte tekubiddwaamu okwabadde okuteeba ggoolo 32 nga bagiteeba 2.
Uganda era yawangudde basketball ne volleyball mu basajja wabula bwe yatuuse mu kubaka, n’emalira mu kyokubiri emabega wa Tanzania eyakiwangudde.

Mu kusika omuguwa, Uganda yamalidde mu kyakubiri ate mu misinde, Uganda ne yeeriisa nkuuli mu mitendera egy'enjawulo bwe yawangudde emidaali egiwerako. Mu ngeri y'emu, amyuka Sipiika wa Palamenti ya Uganda, Thomas Tayebwa y’omu ku baawangudde omudaali mu golf. Tayebwa yatenderezza omutindo gw'ababaka banne n’agamba nti baakoze omulimu gwa ttendo nnyo okukuumira bendera ya Uganda waggulu.

"Eri bammemba mwenna abawaniridde bendera ya Uganda, mutukoze bulungi nnyo kuba okuwangula emizannyo gino kubadde kwewaayo n'okulaga omwoyo gw'eggwanga," Tayebwa bwe yagambye.

Yagasseeko nti, "Nsaba tutandikirewo okwetegekera empaka eziddako e Kenya omwaka ogujja kuba kati buli omu agenda kutwetegekera mu ngeri ey'enjawulo.”

Tayebwa yatenderezza Sipiika wa Palamenti, Annet Anita Among olw'okukola ennyo okulaba nga ttiimu eno etuuka ku buwanguzi.