City Oilers yeeriisa nkuuli mu mpaka z'ensero e South Africa
CITY Oilers bakyampiyoni ba liigi y’eggwanga ey’oku ntikko mu basketball bali mu kibuga Johannesburg ekya South Africa bafootola ttiimu ezeeyita empanguzi mu z’okusunsulamu eza Africa ezinaazannya mu z’akamaliriza omwaka ogujja.
City Oilers yeeriisa nkuuli mu mpaka z'ensero e South Africa
By Gerald Kikulwe
Journalists @New Vision
Mu Elite 16 BAL qualifiers
COSPN 78-73 JBC
Cape Town 69-61 NBA Academy Africa
Ferroviario da Beira 86-100 City Oilers
Pazi Basketball 85-88 Dynamo
CITY Oilers bakyampiyoni ba liigi y’eggwanga ey’oku ntikko mu basketball bali mu kibuga Johannesburg ekya South Africa bafootola ttiimu ezeeyita empanguzi mu z’okusunsulamu eza Africa ezinaazannya mu z’akamaliriza omwaka ogujja.
Eggulo (November 23, 2023) baamazeeko ensiike ssatu ez’ekibinja B nga baziwangudde zonna bwe baakubye Club Omnisport Police National (COSPN) eya Madagascar (81-76), JCB eya Zimbabwe (84-71) ne Ferroviario da Beira eya Mozambique (100-86).
Baayiseewo okwesogga semi nga bakulembedde ekibinja n’obubonero 6, kati baakuttunka ne Dynamo eya Burundi (November 25, 2023) ku semi ezinaabeera ku kisaawe kya Ellis Park Arena mu kibuga Johannesburg ekya South Africa.
Omutindo gwa City Oilers gw’awadde abawagizi essuubi nti Uganda yandiwangula ekikopo ky’ezookusunsulamu zino bwe yataddewo likodi y’okuteeba ensero ennyingi mu nsiike emu nga bakuba Ferroviario da Beira eya Mozambique (100-86).
Germaine Roebuck ye yasinze okwolesa omutindo omulungi mu nsiike ya Ferroviario da Beira bwe yateebye ensero 20 ne libaawundi 11 (Double), Parrish Petty (17), Robinson Opong (15), Tonny Drilleba (13), Brandon Ssebirumbi (12) bonna baakoze libaawundi eziwera 10.
Ttiimu bbiri ezituuka ku fayinolo y’ezookusunsulamu zino n’eyo eneemalira mu kyokusatu zaakwesogga butereevu eza BAL ezookuzannyibwa omwaka ogujja.
City Oilers okuyitawo yeetaaga wiini emu yokka ku Dyanamo okwesogga eza BAL sizoni eyookubiri ey’omuddiring’anwa.