Eya Uganda eyongedde amaanyi mu kwetegekera ez'ensero

Gazelles mu z’omukwano

Uganda 82-69 Ireland

Ireland 56-71 Uganda

OMUTENDESI wa Gazelles ttiimu y’eggwanga eya basketball w’abakazi omuggya, Goran Lojo atandikidde mu ggiya omulimu ogwamuweereddwa, Uganda bw’ekubye Ireland ensiike zombi ez’omukwano mu kibuga Berlin ekya Girimaani.

Gazelles emaze wiiki bbiri mu Girimaani gye yagenda okugezesebwa nga beetegekera empaka z’okusunsulamu eza Afrika omwaka ogujja mu kibuga Kigali ekya Rwanda.

Eno y’ensonga lwaki Goran enzaalwa za Bosnia yatutte Gazelles mu Girimaani okwongera okutegeera ttiimu gy’atendeka bw’ezannya. Ku Ssande, baggulawo n’ensiike ey’omukwano ne bakuba Ireland (82-69) ate eggulo badding’anye era Uganda n’ewangula (71-56).

Wadde Uganda yawangudde ensiike eyasoose, baatandise ng’omutindo guli wansi wabula baazukukidde mu ‘quarter’ eyookusatu ate mu nsiike eyookubiri gye baawangudde (71-56), Uganda yatandikidde mu ggiya naye ne Ireland yabadde eyongeddeko omutindo.

Kapiteeni wa Gazelles omuggya Jane Asinde ye muzannyi eyasinze mu nsiike zombi. Mu yasoose, yateebedde Gazelles ensero 20 ate ensiike eyookubiri, yakoze ensero 13 ne libaawundi 10.

Mu ngeri y’emu omuzannyi wa Uganda enzaalwa za Amerika, Paige Robinson yabadde mmundu mmenye bwe yateebye ensero 26 mu nsiike eyasoose ate mu yookubiri ensero 23.

“Omutindo tegwabadde mulungi mu ntandikwa, abazannyi baffe baabadde balina ekiwuggwe naye twetereezezza, ttiimu n’etereera. Ndi musanyufu nti abazannyi balina ennyonta ate by’obatendeka babiteeka mu nkola,” Goran bwe yategeezezza.