Aba City Oilers balwanirira kukiika gw'akubiri muz'akamalirizo

2023 Zonal 5 BAL qualifiers

Ferroviario da Beira (Mozambique) – JBC (Zimbabwe)

NBA Academy (Africa) – Pazi BBC (Tanzania)

City Oilers (Uganda) – COSPN (Madagascar)

Cape Town Tigers (South Africa) – Dynamo BBC (Burundi)

CITY Oilers bakyampiyoni ba liigi y’eggwanga ey’oku ntikko mu basketball emirundi 9 egy’omuddiring’anwa, beesozze olwokaano lw’okulwanira ekifo mu za ttiimu empanguzi mu Africa eza ‘Road to BAL qualifiers’ ku mutendera ogusembayo ogwa ttiimu 16.

Leero Lwakubiri (November 21, 2023) bali mu kibuga Cape Town ekya South Africa, baggulawo ne COSPN eya Madagascar nga baagala kutandika na buwanguzi okutangaaza emikisa egibayingiza Champions League wa Afrika mu basketball omulundi gwabwe ogwokubiri ogw’omuddiring’anwa mu byafaayo.

Okutangaaza emikisa gyabwe balina okulwana okumalira mu bifo ebibiri ebisooka mu kibinja B omuli; Ferroviario da Beira (Mozambique), Club Omnisport Police National (COSPN) eya Madagascar ne JCB (Zimbabwe).

Ssinga emaliri mu bifo ebibiri, yaakwesogga semi nga yeegattibwako ebbiri eziva mu kibinja A omuli; Cape Town (South Africa), NBA Academy (Africa), Pazi BBC (Tanzania) ne Dynamo (Burundi).

Ttiimu bbiri ezituuka ku fayinolo, n’eyo eneemalira mu kifo ekyokusatu zaakuyitawo butereevu okwesogga eza 2024 BAL.

Omulundi guno City Oilers yagenze terina kapiteeni waabwe Jimmy Enabu, Ben Komakech, Rual Luak, Henry Muliira ne Ceacer Kizito olw’obuvune ate abalala omutindo guli wansi.

Wabula omutendesi waabwe Mandy Juruni eyongeddemu ebyasi okuli; Germain Roebuck Junior, Brandon Ssebirumbi, Anthony Miller Junior Dane, Robinson Opong Odoch ne Parish Petty Perry.

Eno sizoni yaakuna nga City Oilers beetaba mu z’okusunsulamu okwesogga eza BAL (2021, 2022 ne 2023) wabula sizoni ewedde ye yokka gye baakuba akaggi okukiika mu zaakamalirizo (BAL) bwe baayitawo nga ttiimu eyakwata ekyokusatu oluvannyuma lw’okuwangula Urunani eya Burundi (71-62).

Ezaakamalirizo (BAL) zaabagoya bwenvu bwe baalemererwa okuva mu kibinja kya Nile Conference, baamalira mu kifo kya 6 ku ttiimu 6 nga bawangudde ensiike emu yokka ku ttaano.

Okukiika mu zaakamalirizo sizoni ewedde kyabawadde omukisa okutandikira ku mutendera ogusembayo mu z’okusunsulamu sizoni eno ate okukakasibwa okuzannya mu z’okusunsulamu zino kyaddirira okuwangula liigi y’eggwanga 2022.

Club Omnisport Police National (COSPN) be bakyampiyoni ba liigi ya Madagascar era kye kyabayisizzaawo okwesogga ez’okusunsulamu zino. Wabula basisinkana City Oilers leero nga bagilinako obusungu bwa sizoni ewedde bwe yabakubira mu kibinja ky’ezokusunsulamu zino (71-59), kati baagala kwesasuza.

Ttiimu 12 ze zirina okukiika mu zaakamalirizo okuli; Sporting Club Bangui eya Central African Republic, Al Ahly Benghazi (Libya) ne Faith Union Sport (FUS) eya Morocco ezaayitawo edda