City Oilers efunye wiini egizzizza engulu mu z'okusunsulamu eza Afrika

2022 Zonal 5 BAL qualifiers

Eggulo (Lwakusatu)

City Oilers 83–73 Matero Magic (Zambia)

COSPN (Madagascar) 53-84 Beira (Mozambique)

NBA Academy 79-69 Urunani (Burundi)

KPA (Kenya) 72-96 Cape Town (South Africa)

Leero (Lwakuna)

CFB - City Oilers

COSPN - Matero Magic

KPA - Matero Magic

Cape Town - Urunani

OBUWANGUZI bwa City Oilers obwa (83-73) bwe yaggye ku Matero Magic eya Zambia eggulo Lwakusatu, bwagiyisizzaawo okwesogga semi mu z’okusunsulamu ttiimu empanguzi ez’obuvanjuba bwa Afrika okukiika mu Champions League wa basketball (BAL) ku lukalu lwa Afrika.

Bali mu kibuga Cape Town ekya South Afrika era baasoose kumegga COSPN eya Madagascar (71-59) nga kati balwanira kukulembera kibinja F omuli; Ferroviario da Beira (Mozambique), Cobra Sport (South Sudan) ne COSPN (Madagascar).

Mandy Juruni (ku ddyo) ng'alina notisi z'awa abazannyi be.

Omutendesi wa City Oilers, Mandy Juruni okwongeramu kapiteeni Jimmy Enabu abadde ku buvune, Titus Lual ne Fayed Bbaale aba UCU Canons kw’ossa William Ngor Barnaba ne Jones Falando abazannyira mu America kyayongedde amaanyi mu ttiimu era mugumu nti basobola okukola ekyafaayo ne bakiika mu za BAL omulundi ogusooka.

Leero (Lwakuna) battunka ne Ferroviario da Beira eya Mozambique nayo eyaakawangula ensiike zaayo ebbiri ezaasoose nga City Oilers bwe yakoze. Singa City Oilers ewangula ensiike ya leero, ejja kumalira ku ntikko y’ekibinja F.

Drileba nga bamusitudde

Ku semi fayinolo, singa City Oilers emalako ng’ekulembedde ekibinja F, ejja kusisinkana ttiimu eneekwata ekyokubiri mu kibinja G omuli; Urunani BBC (Burundi), KPA (Kenya), NBA Academy Africa ne Cape Town eya South Afrika abategesi.

Ttiimu ebbiri ezituuka ku fayinolo ze zikiikirira Zone 5 mu za BAL.

Ttiimu 6 ze zirina okuyita mu z’okusunsulamu okwetooloola Afrika, olwo zeegatte ku za Angola, Nigeria, Rwanda, Senegal ne Tunisia ezaayitawo obutereevu mu za BAL.