Amawulire
Buganda etongozza ekijjukizo ky'amatikkira ga Kabaka
EKIJJUKIZO ky'amatikkira ga Kabaka Mutebi II kitongozeddwa ne kyongera ebbuggumu mu nteekateeka y'amatikkira ag'omulundi ogwa 31. Kino kitereddwa ku ttendekero lya Buganda Royal Institute of Business & Technical Education e Kakeeka-Mmengo nga kyakoleddwa mu geeti ey'omulembe eyawemmense ensimbi ezasuse obukadde bwa Uganda 300
Buganda egguddewo ekijjukizo ky'amatikkira ga Kabaka
By: Dickson Kulumba, Journalists @New Vision
EKIJJUKIZO ky'amatikkira ga Kabaka Mutebi II kitongozeddwa nekyongera ebbuggumu mu nteekateeka y'amatikkira ag'omulundi ogwa 31.
Kino kitereddwa ku ttendekero lya Buganda Royal Institute of Business & Technical Education e Kakeeka-Mmengo nga kyakoleddwa mu geeti ey'omulembe eyawemmense ensimbi ezasuse obukadde bwa Uganda 300.
Nnaalinya Sarah Kagere yeyaguddewo ekijjukizo kino ng'ali wamu ne Minisita Omubeezi ow'ebyenjigiriza ebya waggulu mu gavumenti eyawakati, Dr. JC Muyingo eyabadde omugenyi ow'enjawulo ku mukolo guno.
Kagere yalaze okwenyumiriza nti yafunye omukisa okutongoza ekijjukizo kino bwatyo n'akulisa Kabaka okutuuka ku matikkira g'omulundi guno.
"Tusanyuse nnyo nti omwaka guno nga Ssabasajja Kabaka ng'ajjaguza amatikkira ag'omulundi ogwa 31ate ne jjubireewo ey'emyaka 25 egya Buganda Royal Institute wetuukidde. Twebaza Katonda olw'okututuusa ku bijjaguzo bino," Nnalinya Kagere bweyayogedde.
Yayongedde neyebaza Katonda, olw'okukomyawo mirembe Kabaka Mutebi II mu nsi ye ng'ava e Namibia era n'asaba abantu okugenda mu maaso n'okumusabira atereere bulungi.
Buganda
Omukolo guno gwabadde gwa kujjaguza emyaka 25 bukya Buganda Royal etandikibwa era Minisita Dr. JC Muyingo nga yeyali Minisita wa Kabaka ow'ebyenjigiriza mu 1999 eyaliwo ng'ettendekero lino litandikibwa yagambye nti byonna byaali mu kiseera kino, byaava ku bumanyirivu bweyafuna mu kiseera weyaberera Minisita w'ebyenjigiriza mu Buganda.
Yagambye nti nga Kabaka amuwadde obuvunanyizibwa okutandika ettendekero lino, yafuna omukisa okuyita ebintu bingi mu ntambuza y'amattendekero bwatyo n'akubirizza abantu okuwerezanga Kabaka mu mbeera yonna awatali kusooka kutunulira byanfunira wa kubanga obuwereeza bwa Kabaka buganyula.
" Nneebaza Kabaka olw'okulengera wala natandika ettendekero ly'ebyemikono. Lino kkubo tuufu ne gavumenti mwetambulira okukulakulanya eggwanga. N'olwekyo mulina obuwagizi bwa gavumenti 100 ku 100," Dr. Muyingo bweyagambye.
Minisita Muyingo era yategezezza nga gavumenti bwagenda okutongoza enkola enasobozesa abaana ba Uganda okufuna emisomo gy'emikono ku bwereere ng'eno yeegatta kweeyo eya Pulayimale ne siniya ebibaddewo.
Bano baalambudde ebintu e gy'emikono abayizi b'ettendekero byebaakoze okwolesa ebyo byebasomeseddwa mu myaka gino 25 nga bakulembeddwamu akulira ettendekero lino, Joseph Balikuddembe Ssenkusu.
Ssenkusu yategezezza ng'ettendekero lino bwerigunjudde abayizi abasoba mu 10000 era nategeza nga bwebagenda okwongera okuteekawo enkola ezitumbula eby'enjigiriza naye neyebaza Kabaka olw'okutandika ettendekero lino mu kiseera ng'ebyemikono tebirowozebwako nnyo.
Katikkiro wa Buganda yakikkiriddwa Ssabawolereza Christopher Bwanika ng'ono yeyali Omumyuka wa Dr. JC Muyingo ng'ettendekero lino litandika.
Bwanika yasabye ettendekero lino lirowooze ku kuteeka amattabi mu bitundu bya Buganda okusobozesa abaana ba Buganda okufuna omukisa okuyiga eby'emikono,batumbule eby'enfuna byaabwe ate n'asaba abantu ab'enjawulo okuwaayo ebintu eby'enjawulo nga yingini z'emmotoka,ebyuma bisobole okuyamba ku bayizi okuyiga eby'emikono butereevu.
Minisita w'ebyenjigiriza mu Buganda, Cotlida Nakate Kikomeko yalaze ng'Obwakabaka bwe bumaliridde okulaba ng'abantu baabwo, bafuna eby'enjigiriza ebisoboka ate nga byamutindo.
Ettendekero lino lisiimye abantu ab'enjawulo abaliko byebakoze mu bulamu bwaalyo obw'emyaka 25. Ku bano kuliko Abaaliko ba Minisita b'ebyenjigiriza Dr. Muyingo ne Dr. Masagazi Masaazi. Abaaliko Abakulira ettendekero lino; Laeticia Nakimuli, Dr. Anthony Wamala-kati Minisita w'Obuwangwa n'ennono mu buwangwa n'abakozi abalikoddemu emyaka 25 bonna nebaweebwa ebirabo eby'enjawulo.
Ku lw'okusatu lwa wiiki ejja nga July 31,2024, Obuganda lwebugenda okujjaguza amatikkira ga 31 ng'omukolo omukulu gwakubeera ku Lutikko e Namirembe.
Enkya ku Lwokutaano, wagenda kubeerawo okusaala ku mizikiti gyonna okwetoloola Obwakabaka nga basabira Kabaka n'Obwakabaka.