GreenlandAmerica ewadde Ukraine ‘Robot’ etabudde Putin

AMAGYE ga Ukraine galeese emmundu eyeenasula yokka n’ekuba abalabe nga tekuli muntu agituddeko, n’ereka Putin ng’atabuddwa.
Emmundu eno eyakoleddwa mu tekinologiya ow’ekikugu ennyo, agiyamba okulowooza ng’omuntu.
Eno ye yafutizza amagye ga Putin okumala ennaku 45, nga balowooza waliwo abantu bangi be balwana nabo, kumbe ng’emmundu eyeenasula yokka eri emu.
Omukutu gwa Daily Mail gugamba nti emmundu eno, etuula ku ‘Robot’ eyatuumiddwa DevDroid TW 12.7, etaasizza Ukraine obutawamba ebimu ku bitundu byayo, Putin byabadde ayagala okusalako nga tebannagenda mu nteeseganya, era akakodyo kaabadde akozesa, kwe kwongera ennumba ez’okumukumu mu kiseera kino nga olufu lwa maanyi nnyo n’obunnyogovu.
Robot biba byuma abazungu bye baayiiya nga bisobola okukola emirimu egy’amaanyi ate nga mingi, okumala ebbanga nga tebikooye. Mu nkola yaabyo, bisobola okulowooza ne bikola okusalawo ku kiki eky’okukola nga bwolaba omuntu, wadde nga tebituuka ku magezi ga muntu.
Okuva obunnyogovu bwe bwatandika, Russia ezze ewamba ebitundu bya Ukraine ebiwerako, naye mu kitundu Ukraine gye yatadde emmundu eno, baalemeddwa okuyitawo okuwamba wadde olufu lubadde lwa maanyi, ate nga tewali mujaasi wa Ukraine n’omu afudde.
Robot eno eno yasoose kukozesebwa ekibinja ky’amagye ga Ukraine ekya Third Army Corps, era bwe baamaze okugiteeka mu nfo gye baagala, ne bagiteekako emmundu lwasamayinja eyitibwa 50-calibre M2 Browning machinegun, sseruwandula masasi.
Daily Mail egamba nti abajaasi basobola okugisimba mu kifo, ne bagenda mu buwanvu bwa mayiro 15, nga banyiga bunyizi mapeesa nga yo bwesesebbula, ate era nayo esobola okumanya tageti ey’okukuba, ng’esinziira ku nswagiro z’omulabe, ng’ekozesa tekinologiya wa ‘Artificial Intelligence’, ayamba ebyuma bya kompyuta okulowooleza ku misinde egya waggulu ennyo.
Omuduumizi w’ekibinja ky’amagye ekikozesa emmundu eno ekya NC-13, Mykola ‘Makar’ Zinkevych, yagambye nti emmundu eno yabakoledde omulimu ogwetaagisa abajaasi mukaaga okuggusa, singa baba tebattiddwa. Kati yo omulimu yagukoze nga teyeetaaga mmere, ate nga teyiika musaayi ng’abajaasi abalamu, olwo abaserikale baabwe ne basigala nga balamu.
Amagye ga Russia Mykola yagambye nti gaagezaako nnyo okwongera amaanyi mu nnumba zaago, kyokka ne galemererwa okuyitawo, olw’engeri emmundu eno gye yali ewandagazaamu amasasi.
Buli luvannyuma lwa nnaku bbiri, abajaasi abaali bakubye enkambi mu bbanga lya mayiro bbiri okuva emmundu we yali, Mykola yagambye nti baaginonanga ne bagikanikamu katono ne bongeramu n’amasasi olwo ne bagizaayo n’eyongera okukuba. Kino kyabatwaliranga ebbanga lya ssaawa nga nnya zokka.
Mykola yagambye nti ekibinja ky’amagye ekikozesa Robot zino ekya NC-13 kyatandikibwawo mu September w’omwaka oguwedde, era omwaka guno essira kiritadde ku kuteeka emmundu eno mu bitundu eby’enjawulo, zitandike okwetaba mu lutalo, nga zikola ennumba, ku magye ga Russia.
Yagambye nti baakoze ebika by’emmundu zino ebiwerako, omuli n’ekanyuga bbomu, era baakkiriziddwa okuzikozesa.