WALUKAGGA: Akoze ddiiru ne Magoola okulemesa Sseggona

MATHIAS Walukagga Mulumba, NUP gwe yawa kaadi okuvuganya mu Busiro East akoze ddiiru n’omusuubuzi Emmanuel Matovu Magoola okulemesa omubaka Medard Lubega Seggona ne Hajji Abdul Kiyimba owa NRM.
Ddiiru eno y’entikko y’enteeseganya ez’ekyama ezaatandika okuva akakiiko lwe kaawandula Walukagga mu lwokaano lwa Busiro East nga December 8, 2025, n’omulamuzi wa kkooti enkulu Simon Kinobe, Walukagga gye yali yeekubidde enduulu bwe ‘yakomerera omusumaali ogusembayo mu ssanduke ya Walukagga nga December
21 2025 mu nsala eyamala eggobe mu kibya.
Ensonda zaategeezezza nti ddiiru ya Walukagga ne Magoola erimu ebintu bingi Magoola by’alina okutuukiriza ng’okulonda tekunnabaawo ne bwe kunaaba kuwedde ng’ayingidde Palamenti ate nga ne ku ludda lwa Walukagga, kyakkaanziddwaak atambule ne Magoola mu Konsitityuwensi gattak n’okumuyiggira akalulu mu ngeri zonna ne bwe kinaaba kyetaagisa kumukubamu buyimba obumusuuta mu balonzi
ba Busiro East.
Akamu ku bukwakkulizo mu ddiiru eno, Walukagga yakatuukirizza eggulo bwe yakubye olukung’aana lwa bannamawulire ng’ali bulembwe ne Magoola ku Das Berliner Hotel e Bulenga n’ayatula mu lujjudde nti abawagizi be akalulu bakayiire Magoola. Wabula Walukagga yategeezezza nti okuwagira Magoola akikoze ng’omuntu,
 wabula ng’essaawa yonna agenda kutuukirira bakama be mu kibiinakye ekya NUP abannyonnyole ku nsonga eno.
Magoola yategeezezza nti Walukagga okusalawo n’amuwa ku masannyalaze alina essuubi nti b’avuganya nabo ku kifo kino agenda kubawangulira waggulu. Magoola attunka n’abantu 11 okuli; Sseggona (IND), Hajji Kiyimba (NRM), Eng. Lilian Nakate- IND, Masmoos Kalungi (JEEMA), Fatumah Bangi (ANT), Leonald Byenkya-IND, Karooli Ssenfuma Nalagira (PFF), Irene Nassolo (EPU), Margret Nalubowa (UPC),
Edward Lutaaya Gaakirawo (IND) ne Fred Kangave (FDC). Yagambye nti ekyokuba ng’avuganyizza enfunda eziwera ng’awangulwa, ku mulundi guno ensolo ku kizigo kw’eri. Magoola y’omu ku baasaba kaadi ya NUP n’atagifuna.
Robert Kyagulanyi bwe yali e Mpigi gye buvuddeko ng’anoonya obululu yategeeza nga NUP bw’etagenda kuwagira muntu yenna ku 12 abaali basigadde mu lwokaano lwe Busiro East. Yategeeza nti Walukagga gwe bamanyi era amangu ddala ng’amaze okulayira ku bwa Pulezidenti bagenda kuddamu okutegeka okulonda kwa Busiro East