Olukiiko lw’Abepisikoopi lusabidde eggwanga ku by’okulonda

OLUKIIKO olugatta Abasumba ba Klezia olwa Uganda Episcopal Conference lufulumizza essaala egenda okuyamba eggwanga okuyita mu kulonda kwa 2026 mu  mirembe.
Ekiwandiiko ekyafulumiziddwa Omusumba w’essaza lya Kiyinda Mityana, Rt Rev. Joseph Anthony Zziwa era akulira olukiiko lw’abasumba mu ggwanga, yeebazizza Katonda olw’ekirabo ky’eggwanga Uganda, abantu baamu n’ebyobugagga byamu.
Ng’eggwanga lisemberera okulonda, yasabye Katonda alung’amye eggwanga ng’aliwa
obukuumi n’omukisa. “Tuwe amagezi agalonda bakulembeze ba mwoyo gwa ggwanga, abasobola okulwanirira amazima n’obwenkanya, era abasobola okuwuliziganya mu ngeri y’okwewa ekitiibwa.
Buli kye tukola kibeere nga kigenderera kuleeta mirembe  n’obwenkanya mu Uganda. Tusabira akakiiko k’ebyokulonda kakole omulimu gwako mu ngeri y’obuvunaanyizibwa, obwesimbu n’amazima. Abeesimbyewo babeere beetowaze eri abantu nga banoonya obululu n’abalonzi babeere n’obuvumu n’obugumiikiriza nga bw’obalung’amya ku mukulembeze gwe balina okulonda.
Tuwonye ebikolwa by’obutabanguko, otutangire obukyayi mu mitima gyaffe n’ebirowoozo byaffe bikulembeze ebigasa eggwanga. Tuwonye okulowooleza mu mawanga, omululu, amalala n’ebikolwa by’okusosola ebirala. Tukulembeze
omwoyo gw’obumu okusinga enjawukana, era n’emitima gyaffe gijjule okwagala eri eggwanga lyaffe. Leka amazima gasalewo ebigambo bye tufulumya, emirembe gikulembere ebikolwa byaffe, era obulamu bwaffe bubeeremu essuubi.
Oluvannyuma lw’okulonda, tusaba eggwanga lyaffe lisigale nga liri bumu n’amaanyi nga tujjukira eng’ombo y’eggwanga lyaffe egamba nti; Ku lwa Katonda n’ensi yaffe.