Vision Group yaakuwagira Ekkanisa okutegeka Namugongo

KKAMPUNI ya Vision Group efulumya ne BUKEDDE yeeyamye okuyambako
Obulabirizi bw’omu Bukiikakkono bwa Uganda mu kutegeka olunaku lw’Abajulizi omwaka guno.
Akulira Vision Group, Don Wanyama bino yabyogeddem asisinkanye Abalabirizi babiri nga be baakiikiridde bannaabwe okuva mu Bulabirizi mukaaga obw’omu Bukiikakkono bwa Uganda obwalondebwa Ekkanisa ya Uganda okukulira enteekateeka z’olunaku lw’Abajulizi omwaka guno.
Abalabirizi babiri abaakyadde ku kitebe kya Vision Group mu kibangirizi kya bannamakolero e Lugogo kwabaddeko, Bp. Godfrey Loum (Northern Uganda) neBp. Wilson Kitara (Kitgum) baayanjudde enteekateeka y’Obulabirizi mukaaga obwa Greater Northern Uganda ku lunaku lw’Abajulizi ne basaba obuwagizi mu byamawulire n’obwa ssente.
Wanyama eyabadde n’omukuhhaanya ow’oku ntikko, Barbara Kaija, n’omumyuka we, Felix Osike, n’abalala, yeeyamye nti Vision Group yaakubunyisa emikolo gino eri ensi yonna nga yeeyambisa emikutu gyayo gyonna omuli; leediyo, empapula z’amawulire, TV n’emitimbagano.
Ku kya ssente, yasuubizza nti baakwetunulamu wamu n’Abakristaayo mu kkampuni oluvannyuma banjulire Ekkanisa ensimbi ze banaaba bakuhhaanyizza, ne yeebaza enkolagana ennungi Vision Group gy’ebadde n’Ekkanisa ya Uganda okumala ebbanga.
Bp. Loum nga ye Ssentebe w’enteekateeka eno, yategeezezza nti, Obulabirizi mukaaga omuli;
Northern Uganda, Lango, West Lango, Madi-West Nile, Kitgum ne Nebbi bwe bwaweereddwa omukisa okutegeka nga mu kiseera kitono bujja kwanja bajeti, nga balonze n’olukiiko oluteesiteesi olw’eggwanga lyonna olw’okukulirwa minisita w’Ebyobulamu, Dr. Jane Ruth Aceng. Yasabye abantu bonna  okwetegekera olunaku lw’Abajulizi olw’omwaka guno kubanga mugenda
kubaamu okwolesa ensinza, amazina, ennyambala n’obuwangwa bw’abantu
abava mu bukiikakkono bwa Uganda