Tulywanyise ebikolwa ebibi ebitufulumamu mu kisiibo

EKISIIBO si kiseera kya kulekayo bulesi byakulya wabula kya kulongoosa omwoyo.
Abantu ba Katonda abaagalwa, ekiseera kino kye tulimu kikulu nnyo mu bulamu bwaffe obw’omubiri ate n’omwoyo. Olw’okuba omuntu abeera mulamu lwa mubiri na mwoyo kale ekiseera kino tuyingira mu kusiiba okukulu nga si kulekayo bulesi byakulya byokka kuba mu byawandiikibwa kirambikibwa bulungi nti ebyokulya ebiyingira mu muntu si bye byonoona empisa z’omuntu wabula ebyo ebimufulumamu.
Ebyokulya bino, tebigenda ku mutima wabula mu lubuto era mwe biva ne bigenda mu kaabuyonjo Makko 7:14-23.
Noolwekyo okubonereza omubiri nga tugumma ebyokulya naddala ebyassava kirungi, wabula kikulu nnyo okufaayo ku bikolwa ebitali bya Katonda ebyo ebiva munda mu ffe era ebya sitaani. Noolwekyo buli muntu asaanidde okunoonya engeri y’okukyusa ebyo ebikolebwa nga biva munda ye ebitali birungi. Mu ngeri y’emu, tulabulwa okuva mu byawandiikibwa bwe tusiiba, tuleme kuba nga bannanfuusi aboonoona endabika yaabwe abantu babalabe nti basiiba, kuba bw’okikola bw’otyo empeera yo oba ogifunye, naye agamba (Katonda) nti bw’osiiba onyirizanga omutwe gwo n’onaaba amaaso, weenyirize, oyo Kitaawo alaba mu kyama abeera ye akulaba: Matayo 6:16-18.
Tulwanyise ebikolwa ebibi ebitufulumamu olwo nno ekisiibo kijja kuba kyamugaso nnyo nga tukendeeza ebikolwa ebibi omuli obukenuzi n’obulyake, obubbi, obutemu obutali bwenkanya, ettamiiro, obwenzi, obukodo n’obukyayi n’ebikolwa ebyeffujjo naddala mu bitongole ebikuumaddembe.
Omusodokisi yenna mu kiseera kino, ng’oggyeeko okulwanyisa sitaani aleeta ebikolwa ebibi, ayongerako n’okulekayo byonna eby’amasavu, ebisiike, amagi, omuzigo, ebitamiiza n’ebyo byonna ebisanyusa emibiri nga mw’otwalidde n’ebikolwa bye kifumbo okutuusiza ddala oluvannyuma lw’Amazuukira amatukuvu.
Eky’okulekayo ebyokulya n’ebitusanyusa kituyambako okubonereza omubiri sso ate okufuba okuleka ebikolwa ebibi kiyamba omwoyo, awo nno omuntu yenna alina omwoyo n’omubiri nga bye bimufuula omuntu omulamba era omulamu.