Katikkiro Charles Peter Mayiga asiimye Bannamawulire abasaka amawulire g'embuga

KATIKKIRO wa Buganda Charles Peter Mayiga agambye nti amawulire g’empapula, leediyo ne ttivvi gakyali ku mwanjo mu kuzimba n’okukulakulanya ensi.

Olw’ensonga eno, Mayiga yagambye nti abali mu mawulire gano, tebasaanye kuva ku mulamwa gw’okubulira ensi buli kituufu ekibeera kigguddewo.

“Twetaaga Bannamawulire abasobola okutubulira eby'esigika. Twetaaga emikutu gy'amawulire egituwa ekikkirizika kubanga agenda n'agamba nti gundi yafudde, abantu nebabugutana,” Mayiga bweyayogedde.

Kkatikkiro ng'ali ne bannamawulire abasakira e Mmengo

Yasinzidde ku kabaga, Obwakabaka kebwategekedde Bannamawulire Abasaka amawulire g’Obwakabaka e Bulange n’agamba nti ekikulu mu mawulire kwe kwogera ekituufu ekibeera kiguddewo kubanga tosobola kubeera ng’olimba abantu buli kadde.

Amawulire agayitira ku mutimbagano bwegabeera gasabikiddwa obulungi yagambye nti nago gasobola okubeera amalungi n’okuzimba eggwanga kyokka n’agamba nti emikutu gino giriko ekizibu kimu nti tekuli musunsuzi kyokka nga mu mawulire, mulimu abasunsuzi!

Bannamawulire abeetabye ku kabaga kano baavudde mu mikutu egy’enjawulo era Minisita w’ebyamawulire, Okukunga abantu era Omwogezi w’Obwakabaka, Israel Kazibwe Kitooke yasinzidde wano n’ategeeza ng’Obwakabaka bwebugenda okuteekawo ekifo omunabeera Kompyuta n’ebyuma ebirala ebikozesebwa mu mawulire okubasobozesa okufuna buli ekigenda mu maaso mu Bwakabaka mu bwangu.

Mayiga yeebazizza Bannamawulire bano nti bakola omulimu munene okumanyisa ensi, ebigenda mu maaso nekibasobozesa okugoberera.

Ahmed Mukiibi omusunsuzi w'olupapula lwa Bukedde naye yabaddewo nnyo

“Singa tukola ebintu ebingi ensi ne tabimanya, tubeera tutengejjera bwereere. Ekyamazima tukola ebintu bingi, ensi bwetakimanya, tubeera tutengejjera bwereere. Atunda ayolesa yamazaawo amangu. Tosobola kubeera na kintu  ng'okikola wekiri kirungi ng'abantu nga tebakimanyi, kibeeranga ekitaliiwo,” Mayiga bweyagambye.

Kazibwe yalangiridde Bannamawulire 10 abasinze okusaka amawulire g’Obwakabaka omwaka guno ng’eyasinze ye Dickson Kulumba owa Bukedde Famire, Ponsiano Mukiibi owa BBS TV, Fred Kibuuka owa 89.2 CBS, Hasheem Ssembuusi owa Sure FM e Mubende, Julius Mulemi, Annet Nalubwama nga ban oba 88.8 CBS, Peter Muweesi owa BBS TV, Joshua Kyambadde owa KTV, Carol Nakibuule owa NBS, Anderson Kevins Kanyike owa Rest Tv ne Denis Kato owa 88,8 CBS.

Omukolo guno era gwetabiddwako Abasunsuzi b’amawulire ku mikutu egy’enjawulo, Bammemba b’ebibiina okuli Buganda Yiyo Buganda Yange ne Buganda Kwe Kwaffe abasasanya ensonga z’Obwakabaka ku mitimbagano era baavuddeyo n'ettu ly'amazaalibwa ga Yesu.