Sheikh Musa Mutyaba alabudde Abasiraamu ku bunnanfuusi
Sheikh Musa Mutyaba, omukulu w’etwale lye Naggulu- Biina era Imam wa Mutungo-Mbuya Masjid Community e Mutungo alabudde abasiraamu ku muze gw'obunanfuusi n'ategeeza nga bwegujja okubayingiza omuliro singa babeera tebenenyezza.
Sheikh Musa Mutyaba alabudde Abasiraamu ku bunnanfuusi
By Huzaima Kaweesa
Journalists @New Vision
Agamba nti eddiini y’Obusiraamu tekolaganira ddala na muntu munnanfuusi era nga Abasiraamu basaanidde okwewalira ddala omuze ogwo.
Nabbi Muhammad (S.A.W) yagamba nti omuntu omunnanfuusi abeera mubi nnyo era alina n’obubonero kw’omulabira era nga buno buli busatu.
i) Bw’aba ayogera/ anyumya alimba.
ii) Bw’alagaanyisa ayawukana ku ndagaano.
iii) Bw’aba yeesigiddwa akumpanya.
Sheikh Mutyaba ategeezezza nti omuntu singa yeesanga nga alina obumu ku bubonero obwo asaana yeerongoose nga bukyali asobole okuwona obusungu bwa Allah n'omuliro.
Nabbi Muhammad (S.A.W) yagamba mu Hadithi emu nti ‘’Abannanfuusi be bagenda okusookera ddala ku ntobo y’omuliro Jahannamah’’. Kino kitegeeza nti omunnanfuusi abeera mubi nnyo era omuntu yenna tayinza kubeera Musiraamu nga talina bwesigwa.
Omusiraamu yenna asaanye akimanye nti tewali mulimu mulungi gwonna gw’ayinza kukola ne gutuuka ng'akyali mulimba.
Abasiraamu tusaana twewale byonna ebitufuula abannanfuusi bwe tuba nga tunaawona obusungu bwa Allah.